საქართველოს ნაკრების საუკეთესო ბომბარდირმა და ამჟამად უკვე გამოცდილმა მწვრთნელმა მორიგი მასტერკლასი თბილისის „ლოკომოტივის“ ახალგაზრდულ გუნდში ჩაატარა. ინფორმაციას თავად ვეტერანი ფეხბურთელი ავრცელებს.
ამასთან, მისსავე სოციალურ ქსელში ვარჯიშის მცირე მონაკვეთის ვიდეოც ვრცელდება, რომელიც Geo Team-ის მიერ არის გადაღებული.
ვარჯიშის დასრულების შემდეგ, შოთა არველაძემ სპეციალური განცხადებაც გაავრცელა.
„მასტერკლასის მესამე სერია მოზარდებთან – ამჯერად კიდევ უფრო დეტალური და მხოლოდ ფორვარდებზე ორიენტირებული. თბილისის ლოკომოტივის, დინამო თბილისისა და 35 საფეხბურთო სკოლის, სხვადასხვა ასაკობრივი გუნდის თავდამსხმელებისთვის სპეციალური ვარჯიში ჩავატარე და ვფიქრობ, ამ დღემ ყველასთვის საინტერესოდ ჩაიარა. ყველაზე რთულ პოზიციაზე ფორვარდები თამაშობენ და ერთ ვარჯიშში ვერ ჩაეტევა ის ყველაფერი, რაც მათ განვითარებაში კიდევ უფრო დაეხმარებათ, ამიტომ ბიჭებს ვარჯიშის შემდეგაც ვუთხარი, რომ დამატებითი, ინდივიდუალური ვარჯიშები აუცილებელია. მადლობა თბილისის ლოკომოტივს და მის პერსონალს მასპინძლობისთვის“, – წერს შოთა არველაძე.
ცნობისთვის, 48 წლის სპეციალისტი ჯერჯერობით უმუშევარია, თუმცა, მის სახელს აქტიურად უკავშირებენ ინგლისის ჩემპიონშიფში მოთამაშე „ჰალ სიტის“. შოთი ბოლოს ტაშკენტის „ფაქტახორში“ მუშაობდა და კლუბთან ერთად ორჯერ გახდა უზბეკეთის ჩემპიონი. ამასთან, არველაძემ გულშემატკივარს თავი აზიის ჩემპიონთა ლიგაზე წარმატებული გამოსვლითაც დაამახსოვრა.
