ესპანურმა გამოცემამ, El Desmarque-მა „ვალენსიას“ ქართველ გოლკიპერზე, გიორგი მამარდაშვილზე სტატია გამოაქვეყნა. სტატიის ავტორი 20 წლის ქართველი მეკარის ასპარეზობას აფასებს.
„ხოსე ბორდალასმა გიორგი მამარდაშვილზე ფსონი კიდევ ერთხელ გააკეთა. ბორდალასის გადაწყვეტილებასთან დაკავშირებით, თუ ვის ჩააყენებდა კარში ბევრი რამ ბურუსით იყო მოცული, თუმცა ქართველ მეკარეს კიდევ ერთი შესანიშნავი მატჩი ჰქონდა.
მამარდაშვილმა ლა ლიგაში უკვე ორი კარგი შეხვედრა ჩაატარა და ბორდალასის არჩევანმა შედეგი გამოიღო. ქართველი მეკარე ინარჩუნებს ტემპს, რომელმაც ვალენსიას ძირითად შემადგენლობაში მოხვედრის საშუალება მისცა. მართალია, იასპერ სილესენი ვარჯიშს დაუბრუნდა, მაგრამ ღამურების თავკაცმა გიორგი ხეტაფესთან ნაჩვენები თამაშის გამო დააჯილდოვა და ნდობა გამოუცხადა. გრანადას გოლისა და იმის მიუხედავად, რომ ბევრი საქმე არ ჰქონია, მამარდაშვილმა მაღალი დონე აჩვენა და სილესენს მისთვის ძირითადში ადგილის წართმევა გაუჭირდება.
აღსანიშნავია, რომ პირველი გოლის ეპიზოდში ქართველმა მეკარემ პოზიციური შეცდომა დაუშვა და წარმატებული საწყისი ტაიმი არ ჰქონია, თუმცა მეტოქეს ბევრჯერაც არ შეუწუხებია. მეორე ნახევარი იმავე სცენარით წარიმართა და მამარდაშვილი დამაჯერებელი იყო. რაც მთავარია, ქართველმა მეკარემ გრანადას მეორე გოლის გატანის საშუალება არ მისცა. მე-2 ტურის შეხვედრაში, მამარდაშვილმა ბურთის თამაშში შეყვანისას რამდენჯერმე შეცდომა დაუშვა და არასწორი გადაწყვეტილებები მიიღო, თუმცა საერთო ჯამში, ცუდი შთაბეჭდილება არ დაუტოვებია. ხეტაფესთან ნაჩვენებ დონეზე თამაშის გაგრძელება ურთულესია, მაგრამ მამარდაშვილი კიდევ ერთხელ იყო იმის ერთ-ერთი განმაპირობებელი ფაქტორი, რომ ვალენსიამ ქულა აიღო“, – წერს გამოცემა.
შეგახსენებთ, რომ ლა ლიგის მე-2 ტურში გიორგი მამარდაშვილის “ვალენსია” “გრანადას” სტუმრად დაუპირისპირდა და შეხვედრა ფრედ (1:1) დასრულდა. ქართველმა ძირითად შემადგენლობაში ზედიზედ მეორედ ითამაშა, მაგრამ სადებიუტო მატჩისგან განსხვავებით, ამჯერად კარი მშრალად ვერ შეინახა.
“ვალენსიას” ლა ლიგაში 2 ტურის შემდეგ 4 ქულა აქვს მოპოვებული. ხოსე ბორდალასის გუნდი 27 აგვისტოს, შინ “ალავესს” უმასპინძლებს.
