ლუკა გაგნიძე, რომელიც ცოტა ხნის წინ მოსკოვის “დინამომ” “დინამო” თბილისისგან შეიძინა, კარიერას იჯარის წესით “ურალში” გააგრძელებს. ეკატერინბურგის კლუბმა 18 წლის ქართველი ნახევარმცველი იჯარით 2021/22 წლების სეზონის ბოლომდე აიყვანა.
“ლუკა უკვე ეკატერნიბურგშია. ვუსურვებთ ახალგაზრდა ფეხბურთელს თავდაჯერებულად თამაშსა და რუსეთის პრემიერლიგაში სწრაფ დებიუტს”, – ნათქვამია ურალის ვებ-გვერდზე.
შეგახსენებთ, რომ მოსკოვის “დინამომ” ლუკა გაგნიძე 1,5 მილიონი ევროს სანაცვლოდ დაიმატა და მას 5-წლიანი კონტრაქტი გაუფორმა. თავიდანვე ვრცელდებოდა ინფორმაცია, რომ მოსკოვის კლუბი გაგნიძეს პრაქტიკის მისაღებად რომელიმე კლუბში გაანათხოვრებდა.
ლუკა გაგნიძეს “დინამო” თბილისში 16 მატჩი აქვს ჩატარებული და მის ანგარიშზე ერთი გოლი და სამი საგოლე პასია.
ეკატერინბურგის “ურალი” რუსეთის პრემიერლიგაში გამოდის. გასულ სეზონში გუნდმა 34 ქულით მე-12 ადგილი დაიკავა და დაქვეითებას გადაურჩა. “ურალი” 2021/22 წლების სეზონის პირველ მატჩს 25 ივლისს, შინ “კრასნოდართან” ჩაატარებს.
