ლა-ლიგის 33-ე ტურში, მადრიდის „რეალმა“ უმნიშვნელოვანესი ქულები დაკარგა, რაც შესაძლოა სამეფო გუნდს ჩემპიონობის ფასადაც დაუჯდეს.
ზინედინ ზიდანის შეგირდებმა, შინაურ კედლებში „ბეტისს“ ვერ აჯობეს და მატჩიც ფრედ – 0:0 დასრულდა. „რეალი“ ამჟამად სატურნირო ცხრილში 71 ქულით მეორე ადგილზეა და თანაქალაქელ „ატლეტიკოს“ მცირედით ჩამორჩება. დიეგო სიმეონეს გუნდი 73 ქულით პირველ პოზიციაზეა და ყველაფერთან ერთად „ატლეტიკოს“ ერთი თამაში რეზერვში აქვს. რაც შეეხება „ბარსელონას“, კატალონიელიებიც „რეალზე“ უკეთეს სიტუაციაში არიან, რადგან 2 მატჩით ნაკლები აქვთ ჩატარებული.
„ბეტისთან“ ვერ მოგების შემდეგ, „რეალის“ თავკაცი ზინედინ ზიდანი იხტიბარს არ იტეხს და იმედოვნებს, რომ ქულებს სხვებიც დაკარგავენ.
„რა თქმა უნდა, მოგება გვსურდა. დღეს 3 ქულის მოპოვების შემთხვევაში გაცილებით უკეთეს ვითარებაში ვიქნებოდით, თუმცა დაკარგული ჯერ არაფერია. პირიქით, მთავარი ბრძოლები წინ არის.
მეეჭვება, ჩვენმა კონკურენტებმა დარჩენილ მატჩებში ქულათა მაქსიმუმი აიღონ და თუ მაინც მოახერხეს ამის გაკეთება, მაშინ ჩემპიონები ვეღარ გავხდებით“ – ამბობს ზინედინ ზიდანი.
