ევროპის, მსოფლიოს და ოლიმპიური ჩემპიონი თავისუფალ ჭიდაობაში ვლადიმერ ხინჩეგაშვილი მოახლოებულ ტოკიოს თამაშებზე არ იქნება.
ქართველ ფალავანს, „ტოკიო 2020“-ის ლიცენზია ჯერ მოპოვებული არ აქვს და ამის ბოლო შანსი 6-9 მაისს, სოფიაში გასამართ სალიცენზიო ტურნირზე ჰქონდა, თუმცა ბედის უკუღმართობის და უიღბლობის გამო ვერც ბულგარეთის დედაქალაქში იასპარეზებს.
ვლადიმერ ხინჩეგაშვილს კორონავირუსი დაუდასტურდა და შესაბამისად სოფიაში ჭიდაობაც გამოირიცხა. მან, ახლახანს ვარშავაში დასრულებული ევროპის ჩემპიონატიც სწორედ იმიტომ გამოტოვა, რომ სოფიის სალიცენზიო ტურნირისთვის უკეთ მომზადებულიყო და სრულ კონცენტრაციას მასზე აკეთებდა, თუმცა როგორც უკვე ავღნიშნეთ, ხინჩეგაშვილს ვირუსი შეეყარა.
“ყველაზე უადგილო მომენტი და ყველაფერი დასრულებულია” – წერს რიო 2016-ის ტრიუმფატორი ფეისბუქის საკუთარ გვერდზე.
თავისუფალი სტილით მოჭიდავეთა ნაკრების მთავარ მწვრთნელს, გიორგი იანტბელიძეს თავსატეხი გაუჩნდა. ამ ეტაპზე საქართველოს ნაკრების ყულაბაში მხოლოდ 3 ლიცენზიაა, რომლებიც გენო პეტრიაშვილს, ელიზბარ ოდიკაძეს და ავთანდილ კენჭაძეს აქვთ. დარჩენილ წონებში კი თავისუფალი სტილით მოჭიდავეები ოლიმპიური ლიცენზიების მოპოვებას ბოლო შანსის ტურნირზე გეგმავდნენ.
