1995 წლის 25 იანვარს მომხდარი ფაქტი საფეხბურთო სამყაროს არასოდეს დაავიწყდება. თითქმის სამი ათეული წლის შემდეგაც, იმ ამბავს საფეხბურთო ექსპერტები, მწვრთნელები თუ გულშემატკივრები გუშინდელი დღესავით იხსენებენ და მის ირგვლივ მსჯელობენ.
ერიკ კანტონა ყველასგან გამორჩეული ფეხბურთელი გახლდათ. მოედანზე მას სასწაულების გაკეთება და ბურთთან ჯადოქრობა შეეძლო, მაგრამ ასევე ყურადღებას იქცევდა ექსტრავაგანტული ქცევებით.
კანტონამ კარიერა ნაადრევად დაასრულა. ფრანგი ფორვარდი „მანჩესტერ იუნაიტედის“ საკვანძო ფიგურა გახლდათ. წითელი ეშმაკების გულშემატკივრებმა მას „მეფე ერიკი“ შეარქვეს.
დავუბრუნდეთ 1995 წლის 25 იანვარს და იმ ინციდენტს, რომლის გამოც კანტონა ფეხბურთიდან 9 თვით მოკვეთეს. სტაჟიან ქომაგს აუცილებლად ემახსოვრება ფრანგი ფორვარდის ტრიბუნაზე შეხტომა და გაშლილი ფეხით „კრისტალ-პალასის“ ქომაგისთვის სახეში ჩარტყმა.
„საფრანგეთში დედაშნთან დაბრუნდი, ნაბიჭვარო!“ – ამ სიტყვებით მიმართა ტრიბუნიდან კანტონას ერთ-ერთმა მაყურებელმა. ამ დროს, ერიკ კანტონა მოედნიდან გაძევებული იყო და გასახდელისკენ მიემართებოდა. ფრანგი ფეხბურთელი ისედაც გაღიზიანებული იყო, იმ გულშემატკივარმა კი ცეცხლზე ნავთი დაასხა. შემდეგ კი მოხდა ის, რაც მოხდა…
„ფეხბურთელს ტრიბუნებიდან ხშირად ლანძღავენ. უწმაწური სიტყვების კორიანტელი უცხო არ არის. იმ დღემდე ასეთ ამბებზე რეაგირებას არ ვახდენდი, თუმცა ყოველთვის თავს ვერ შეიკავებ.
იმ დღის შემდეგ ფეხბურთის თამაში 9 თვით ამიკრძალეს, თუმცა არაფერს ვნანობ ერთის გარდა. ვისურვებდი, რომ მისთვის უფრო ძლიერად ჩამერტყა.
ფეხბურთი დიდი ხელოვნებაა, ეს ცხოვრება კი ცირკი. როდესაც გულშემატკივარს ურტყამ თავს მსახიობად გრძნობ.
ცუდი კარიერა არ მქონია. არაერთი სასიამოვნო და კარგი ამბის გახსენება შემიძლია, მაგრამ ფავორიტად მაინც ის ეპიზოდი რჩება, როდესაც იმ ხულიგანს ცხვირ-პირი გავუერთიანე“ – ასე იხსენებს26 წლის წინანდელ სკანდალს ერიკ კანტონა.
