2020 წლის 19 ივნისს საქართველო შემზარავმა ტრაგედიამ შეძრა. თბილისის „საბურთალოს“ ფეხბურთელი გიორგი შაქარაშვილი 4 დღიანი ძებნის შემდეგ, მყვინთავებმა მდინარე არაგვში გარდაცვლილი იპოვნეს.
ეს უბედური შემთხვევა არ ყოფილა. ახალგაზრდა ფეხბურთელი ჯგუფური ძალადობის მსხვერპლი გახდა. სამართალდამცავებმა მალევე აღნიშნულ საქმეზე 17 პირი დააკავა, თუმცა ნაწილი ე.წ. საბურთალოელები ახლახანს გათავისუფლდნენ, რადგან მათ მძიმე მუხლი წაყენებული არ ჰქონიათ.
საზოგადოების გაცხოველებული ინტერესი მკვლელობის ნაწილს უკავშირდება. ვინ მოკლა 19 წლის ნიჭიერი ფეხბურთელი? დაკავებული 17 პირიდან, პროკურატურამ ხუთს, „ტოიოტას“ მარკის ავტომობილის მგზავრებს, ყველას ერთის გარდა მუხლი გადაუკვალიფიცირა და მათ განზრახ, ჯგუფურად დამამძიმებელ გარემოებაში მკვლელობას ედავება.
9 თვიანი სასამართლო განხილვების შემდეგ, 2020 წლის ყველაზე რეზონანსული საქმის საბოლოო განაჩენი დღეს, 9 მარტს გამოცხადდა. მოვლენების ეპიცენტრი მცხეთის რაიონული სასამართლო იყო.
მოსამართლე ბიძინა სტურუამ სრულად გაიზიარა პროკურატურის ბრალდება და ვახტანგ ჩიქოვანი, ნიკოლოზ რევაზიშვილი, არჩილ გაგნიძე, გიორგი ქვრივიშვილი და არასრულწლოვანი ზ.ხ, ფეხბურთელ გიორგი შაქარაშვილის განზრახ მკველობაში დამნაშავედ სცნო.
მათგან სამს – არჩილ გაგნიძეს, ვახტანგ ჩიქოვანს და ნიკოლოზ რევაზიშვილს 16 წლიანი პატიმრობა შეეფარდათ, რაც შეეხება გიორგი ქვრივიშვილს და არასრულწლოვან ზ.ხ-ს მათი პატიმრობის ვადა 16 მარტს გახდება ცნობილი.
