ქართველ ოლიმპიელთა პირველი დიდი ჯგუფი უკვე ტოკიოშია. ამ ჯგუფში შედიან: ძიუდოისტები, ძალოსნები, ტყვიის მსროლელები, მოფარიკავეები. აგრეთვე – სამედიცინო პერსონალი.
ოლიმპიურმა ნაკრებმა გუნდებმა ვარჯიშები უკვე დაიწყეს, სამედიცინო პერსონალი კი შეუდგა ინტენსიურ სარეაბილიტაციო პროცედურებს.
დამღლელი ფრენის შემდეგ, ჩვენი დელეგაციის წევრებმა ჯერ ტოკიოს აეროპორტში, შემდეგ კი ოლიმპიურ სოფელში ჩააბარეს კოვიდ-ტესტები. ყოველდღიური ტესტირება გაგრძელდება მთელი ოლიმპიადის განმავლობაში. მოგეხსენებათ, პანდემიის გამო, დაწესებულია საკმაოდ მკაცრი რეგულაციები, თუმცა ამისთვის ჩვენი ოლიმპიური გუნდი მზად არის. საქართველოს ოლიმპიური მისიის ხელმძღვანელობას აქტიური კომუნიკაცია აქვს საორგანიზაციო კომიტეტის შესაბამის სამსახურებთან, რათა ოპერატიულად მოგვარდეს სხვადასხვა საკითხები.
საქართველოს ოლიმპიური დელეგაციის მორიგი ჯგუფი ტოკიოში 20 ივლისს ჩავა.
ტოკიოს ზაფხული XXXII ოლიმპიური თამაშები 24 ივლისიდან 8 აგვისტოს ჩათვლით გაიმართება.
საქართველოს ოლიმპიური მისიის ხელმძღვანელმა ილია ბერიშვილმა მცირე კომენტარი გააკეთა:
“ოლიმპიური მისია ტოკიოში უკვე რამდენიმე დღეა იმყოფება. 32-ე ოლიმპიური თამაშების დედაქალაქში ჩვენ პირველი სამუშაო დღე უკვე ჩავატარეთ,საორგანიზაციო კომიტეტის წარმომადგენლებს შევხვდით გარკვეული სამსახურების ხელმძღვანელებს. მზად ვართ იმისთვის, რომ პირველი ჩვენი ოლიმპიელები მივიღოთ და ეს მოხდა სწორედ დღეს, აქ ჩამოვიდნენ სპორტის რამდენიმე სახეობის წარმომადგენლები, მათ შორის ჩვენი ძიუდოისტები, ძალოსნები, ტყვიის მსროლელები, მოკრივეები, მოფარიკავეები, სწორედ სანდრო ბაზაძე იყო პირველი ქართველ სპორტსმენთაგან, რომელიც დაბინავდა ოლიმპიურ სოფელში. ჩვენმა სპორტსმენებმა რამდენიმე სახეობაში პირველი ვარჯიშები უკვე ჩაატარეს. მოკლედ ყველაფერი იმისათვის კეთდება, რომ მთავარ ამბავს ოლიმპიურ სტარტებს ჩვენ მაქსიმალურად მომზადებულები და მობილიზებულები შევხვდეთ.”-განაცხადა ბერიშვილმა
