სომხეთთან გამარჯვების შემდეგ, საქართველოს ფუტსალის ნაკრების მთავარმა მწვრთნელმა, ავთანდილ ასათიანმა ჟურნალისტებთან განვლილი მატჩი შეაჯამა.
ასათიანმა იმედი გამოთქვა, რომ გუნდი ერევანშიც წარმატებულ მატჩს ჩაატარებს.
„ყველას გათავისებული ჰქონდა, რომ რთული თამაში გველოდა. სომხეთის ნაკრებში ისეთი დონის ფეხბურთელები დაიმატეს, რომლებიც ევროპის ჩემპიონატზე გასვლის ამბიციას აძლევდნენ. ამ მატჩისთვის ძალიან სერიოზულად მოვემზადეთ, რადგან სატურნირო ცხრილის გარდა, სომხებთან შეხვედრის წინ ძალიან ბევრი დაიწერა, რომ საქართველოს ნაკრებს შანსი არ ჰქონდა. მე ავუხსენი ბიჭებს, რომ ყველაფერი მოედანზე დაგვემტკიცებინა. მე მგონი ჩანდა, რომ ბიჭებმა მაქსიმალურად იბრძოლეს. სამ ქულასთან ერთად ყველაზე მეტად ისიც მახარებს, რომ შეკრებაზე ყოფნის დროს მოწინააღმდეგე შევისწავლეთ. მოთამაშეებს რა დავალებებიც მივეცით, 100 პროცენტით თუ არა, 90 პროცენტით მაინც შეასრულეს. ეს კარგია, რადგან ჩვენ უნდა ვისწავლოთ ტაბლოზე თამაში, იგივე ანგარიშის შენარჩუნება და რა დროს უნდა გავცხარდეთ – მაინც ამბიციური ერი ვართ და ეს თამაშზეც იგრძნობა. ჩემს ბიჭებს მადლობა მინდა ვუთხრა, რომ ეს ყველაფერი გაითავისეს, რა დონის მატჩი იყო და მაქსიმალური კონცენტრაციით ითამაშეს“, – ციტირებს ავთანდილ ასათიანის სიტყვებს „პირველი არხი“.
შეგახსენებთ, რომ ჩვენმა გუნდმა სომხეთის ნაკრები ევროპის ჩემპიონატის შესარჩევი ეტაპის მესამე ტურის მატჩში 5:0 გაანადგურა. ასათიანის გუნდი მომდევნო მატჩს 10 მარტს, ისევ სომხეთის ნაკრებთან გამართავს, ამჯერად ერევანში.
