ფუტსალის ევროპის ჩემპიონატის 1/4 ფინალში, რუსეთის ნაკრებთან მარცხის შემდეგ საქართველოს ნაკრების კაპიტანმა, ზვიად კუპატაძემ განვილი შეხვედრა და ჩვენი გუნდის ევროპირველობაზე გამოსვლა შეაფასა:
„თამაშის გეგმა მარტივი იყო – ბრძოლა ბოლო წამამდე. მეტოქის ყველა მოთამაშეს კარგად ვიცნობ, რადგან ბოლო 20 წელია რუსეთში ვთამაშობ. შეიძლება ითქვას, რომ მათ შვილებზე უკეთ ვიცნობ, ამიტომ რუსეთის ნაკრების თამაში არ გამიკვირდა. თუმცა უნდა ვაღიარო, რომ ისინი უფრო ძლიერები იყვნენ. გასაკვირი არ არის, რომ ისინი თამაშამდე ფავორიტებად მიიჩნეოდნენ“, – განაცხადა კუპატაძემ.
მისივე თქმით, წაგების მიუხედავად საქართველოს ეროვნული გუნდით ამაყობს:
„ვამაყობ ჩემი გუნდით, ბიჭებმა დაამტკიცეს, რომ ნამდვილი მებრძოლები არიან. ალბათ, დღეს შევძელით იმის დამტკიცება, რომ ევროს მეოთხედფინალი ჩვენთვის ზღვარი არ არის. ცოტა იღბლის შემთხვევაში ახლა უკვე ნახევარფინალში გასვლას აღვნიშნავდით, მაგრამ, რა თქმა უნდა, რუსეთის ნაკრებმა ეს გამარჯვება დაიმსახურა“, – ამბობს საქართველოს ნაკრების კაპიტანი.
