საქართველოდან, ავსტრიის ბუნდესლიგაში წასული ფეხბურთელების რიცხვი კიდევ უფრო იზრდება. ამჯერად 20 წლის ლუკა ლომჯარიას შესახებ გიამბობთ, რომელიც ცოტა ხნის წინ „უნიონ ედელვაისში“ გადავიდა.
ლუკა ლომჯარიამ ფეხბურთის თამაში 9 წლის ასაკში 35-ე საფეხბურთო სკოლაში დაიწყო, შემდეგ რამდენიმე წლის განმავლობაში GFF-ის აკადემიაშიც ირიცხებოდა.
ავსტრიაში წასვლამდე კი სოხუმის „ცხუმის“ ღირსებას იცავდა.
„პრაიმ სპორტი“ 20 წლის ფეხბურთელს ავსტრიაში დაუკავშირდა და მასთან მცირე ინტერვიუ ჩაწერა:
– როგორ შეაფასებდით თქვენს ტრანსფერს უნიონ ედელვაისში?
– დადებითად შევაფასებდი, ძალიან კარგი გარემოა და კლუბი პროფესიონალებით არის დაკომპლექტებული.
– მთავარ მწვრთნელთან როგორი ურთიერთობა გაქვს, დაახასიათებდი?
– იდეალური ურთიერთობა მაქვს. სიმართლე გითხრათ, ასე მოკლე დროში არ ველოდი, რომ ასეთი ურთიერთობა ჩამოგვიყალიბდებოდა. ყველაფერს გავაკეთებ, რომ მისი ნდობა გავამართლო.
– რა არის კლუბის მიზნები?
– მთავარი მიზანი რა თქმა უნდა პირველი ადგილის დაკავება და ზედა ლიგაში აღზევებაა. გასულ სეზონს კლუბი პირველ ადგილზე ასრულებდა, თუმცა კოვიდ პანდემიის გამო სეზონი ჩაიშალა.
– სხვა შემოთავაზებები თუ გქონდათ და რატომ გადაწყვიტეთ „უნიონ ედელვაისში“ გადასვლა?
– კი იყო სხვა ვარიანტებიც, როგორც საქართველოში, ასევე ავსტრიაში, მაგრამ კარიერის გაგრძელება „ედელვაისში“ ვარჩიე. კლუბის მხრიდან დავინახე, რომ მათთვის მნიშვნელოვანი ფეხბურთელი ვიყავი, გამომიცხადეს ნდობა და მეც სწორედ ამ კლუბზე შევაჩერე არჩევანი. ვფიქრობ, არ შევმცდარვარ და სწორი ნაბიჯი გადავდგი ჩემი კარიერისთვის.
– რა არის თქვენი მიზანი ამ გუნდში?
– ჩემი მიზანია მაქსიმალურად დავეხმარო გუნდს წარმატების მიღწევაში და პარალელურად, ჩემი თამაშიც უფრო გავაუმჯობესო. ამისთვის ყოველთვის მაქსიმალურად ვიხარჯები და თავს არ ვზოგავ.
– თქვენი აზრით, რა მსგავსება ან განსხვავებაა ავსტრიულ და ქართულ ფეხბურთს შორის?
– მსგავსება ის არის, რომ ავსტრიაშიც არიან ტექნიკური და კრეატიული ფეხბურთელები, ისევე როგორც საქართველოში. განსხვავება კი მაინც ფიზიკურ კონდიციებშია. აქ უდიდესი ყურადღება ეთმობა ფიზიკურ მომზადებას შესაბამისად ტემპიც საკმაოდ მაღალია.
– რომელ პოზიციაზე თამაშობ და როგორ ფიქრობ, რა არის შენი ძლიერი და სუსტი მხარე?
– ვთამაშობ შემტევ ნახევარმცველის პოზიციაზე, ჩემს პლიუსებზე საუბარი არმიყვარს… მინუსებს რაც შეეხება, ესე კონკრეტულად ვერ გამოვყოფ, ყველა ფეხბურთელს აქვს მინუსები და ყოველდღიურად ვცდილობ ამ მინუსების ქცევას პლუსად.
– თქვენ პოზიციაზე ვინ მიგაჩნია საუკეთესოდ ?
– მიჭირს ასე გამოყოფა, მაგრამ კევინ დე ბრუინის თამაში ძალიან მომწონს… ძალიან ჭკვიანი და ტექნიკური ფეხბურთელია, გადაწყვეტილებას წამის მეასედებში იღებს, რაც უდიდესი პლიუსია.
– თქვენ პირველ კლუბზე რომ გვესაუბრო, რამდენი წლის შეხვედი ფეხბურთზე და ვინ იყო თქვენი პირველი მწვრთნელი?
– ჩემი პირველი ნაბიჯები გადავდგი 35-ე საფეხბურთო სკოლაში, 9 წლის ასაკში ჩემი პირველი მწვრთნელი კი ტარიელ კანდელაკი იყო.
– საქართველოს ასაკობრივ ნაკრებებში თუ გითამაშიათ?
– არა საქართველოს ასაკობრივ ნაკრებებში არ მითამაშია.
– რას იტყოდით სოხუმის „ცხუმზე“ და „გაგრაზე“?
– სოხუმის „ცხუმის“ და „გაგრას“ პერიოდს ორივეს ძალიან სასიამოვნოდ ვიხსენებ, ორივე გუნდში სასიამოვნო და მეგობრული გარემოა და ძალიან დამეხმარნენ იმაში, რომ ჩემი თამაში გამეუმჯობესებინა. ორივე გუნდს წარმატებას ვუსურვებ და მეც ისევე, როგორც ყველა ვისურვებდი, რომ მალე ჩვენს აფხაზეთში ჩაეტარებინოთ სახლის შეხვედრები. ასევე ძალიან თბილად და კარგად ვიხსენებ სფფ აკადემიის პერიოდს, სადაც უდიდესი გამოცდილება მივიღე მთავარ მწვრთნელთან, ლეგენდარულ თამაზ კოსტავასთან, რისთვისაც უდიდეს მადლობას ვუხდი მას.
– რა არის თქვენი ოცნება?
– მთავარი ოცნება მიუნხენის „ბაიერნში“ თამაშია. ვფიქრობ, შეუძლებელი არაფერია, მთავარია თავდაუზოგავი შრომა და მიზანდასახულობა. ყველას აქვს შანსი აისრულოს საკუთარი ოცნება.
– რას ურჩევდით მომავალ ფეხბურთელთა თაობას?
– ყველას ვუსურვებდი, რომ თავიანთ მიზანზე კონცენტრირდნენ და თავი არ დაზოგონ ამ მიზნის მისაღწევად. სჯეროდეთ საკუთარი თავის და შესაძლებლობების, არ მიაქციონ ყურადღება იმ ადამიანებს, ვისაც მათი წარმატების არ სჯერათ.
