საქართველო 5:0 სომხეთი
გოლები: 1:0 ელისანდრუ (2), 2:0 ელისანდრუ (4), 3:0 ელისანდრუ (24), 4:0 სებისკვერაძე (27), 5:0 სებისკვერაძე (39)
ფუსტალში ევროპის 2022 წლის ჩემპიონატის მეორე საკვალიფიკაციო ეტაპის მე-3 ტურში საქართველოს ნაკრებმა სომხეთის ნაკრებს თბილისის ოლიმპიურ სასახელში უმასპინძლა და მიმდინარე ციკლში პირველი, თანაც, ძალზე მნიშვნელოვანი გამარჯვება მოიპოვა.
ჩვენი ნაკრები მთელი მატჩის განმავლობაში დომინირებდა და გამარჯვება კითხვის ნიშნის ქვეშ ერთხელაც არ დაუყენებია.
გამოსარჩევია წარმოშობის ბრაზილიელი ელისანდრუს თამაში, რომელმაც სამი გოლი გაიტანა, პირველი კი მართლაც ფენომენალური იყო.
შესანიშნავი მატჩი ჩაატარა სებისკვერაძემაც, რომლის ბოლო გოლი ნამდვილი შედევრი გამოვიდა, მან საკუთარი კარიდან ისე, რომ არც გაუხედავს წინ გამოსულ სომხების მეკარეს შეუსრულა.
საქართველოს ნაკრებს 3 ტურში 4 ქულა აქვს და ამ დროისთვის ჯგუფში მე-2 ადგილზეა. შეგახსენებთ, რომ ავთანდილ ასათიანის გუნდმა პირველ ტურში საფრანგეთთან ფრე ითამაშა 4:4, მე-2 ტურში რუსეთთან წააგო 0:4. ჩვენი გუნდი მომდევნო მატჩს 10 მარტს, სტუმრად სომხეთის ნაკრების წინააღმდეგ ჩაატარებს.
ევროპის ჩემპიონატის ფინალურ ეტაპზე 16 გუნდი ითამაშებს, საიდანაც ერთი ადგილი მასპინძელ ნიდერლანდებს უკვე გარანტირებული აქვს. შესარჩევი ციკლში 8 ჯგუფის გამარჯვებულები და 6 საუკეთესო მეორეადგილოსანი ფინალურ ეტაპზე ავტომატურად გავლენ, ხოლო ორი უარესი მეორეადგილოსანი ერთმანეთს ორრაუნდიან პლეი ოფში შეხვდება და დარჩენილ ერთ საგზურს გაითამაშებს. ევროპის ჩემპიონატს ნიდერლანდების ორი ქალაქი ამსტერდამი და გრონინგენი 2022 წლის 9 იანვრიდან 6 თებერვლამდე უმასპინძლებს.
