საქართველოს ფუტსალის ნაკრები ევრო 2022-ზე ასპარეზობას გამოეთიშა. ჯვაროსნები რუსეთის წინააღმდეგ 1:3 დამარცხდნენ, თუმცა შეხვედრის ბოლო წუთამდე იბრძოდნენ და გულშემატკივრების გული მოიგეს.
საქართველოს ფეხბურთის ფედერაციის პრეზიდენტმა, ლევან კობიაშვილმა სოციალურ ქსელში საინტერესო პოსტი გამოქვეყნა:
“მადლობა ჩვენს ნაკრებს!
სამწუხაროა, რომ ფუტსალის ევროპის ჩემპიონატს გამოვეთიშეთ, თუმცა ჩვენმა გუნდმა ქართული ფეხბურთის ახალი ისტორია უკვე დაწერა.
საქართველოს ეროვნულმა ნაკრებმა კონტინენტის პირველობაზე ისტორიაში პირველად იასპარეზა და ჯგუფური ეტაპის გადალახვაც მოახერხა.
ფუტსალის გუნდის თითოეული წევრი, უდიდეს მადლობას იმსახურებს იმ ემოციებისთვის, რომელიც ქართველ გულშემატკივარს მიანიჭა.
გულდაწყვეტილი ვარ, რადგან დღევანდელ თამაშში ბიჭების საოცარი მონდომება და თავდაუზოგავი ბრძოლა დავინახეთ, რამაც მსოფლიოში ერთ-ერთ საუკეთესო გუნდთან მოგების იმედი გაგვიჩინა. თუმცა, ამაყი ვარ ჩვენი ბიჭებით – მათ შეძლეს და ჩვენი ქვეყანა ევროპის საუკეთესო 8 ნაკრებში მოახვედრეს.
მადლობა ჩვენ საამაყო ბიჭებს თავდაუზოგავი ბრძოლისთვის და დაუვიწყარი ემოციებისთვის! ისტორიას აუცილებლად ექნება გაგრძელება!” – წერს ლევან კობიაშვილი.
შეგახსენებთ, რომ საქართველოს ფუტსალის ნაკრებმა ევროპის ჩემპიონატის ფინალურ ეტაპზე პირველად იასპარეზა.
