თბილისის „დინამოში“ რომ ერთი მნიშვნელოვანი ცვლილება მოხდა და მთავარ მწვრთნელად გიორგი ნემსაძე დაინიშნა არახალი ამბავია. მომავალი სეზონიდან კი შესაძლოა ფეხბურთელთა საინტერესო ნამატიც ჰქონდეთ. მაგალითად ისეთების, როგორიც ჯანო ანანიძე და გიორგი არაბიძე არიან.
ჭორაობა რომ არ გამოგვივიდეს, მეტი სიზუსტისთვის ვთქვათ, რომ გიორგი არაბიძის „დინამოში“ მოსვლის ვარიანტი, რომელიც პორტუგალიურ „ნასიონალში“ ირიცხება, თუმცა უმთავრესად სათადარიგოთა სკამზეა ან განაცხადშიც ვერ ხვდება, ამ ეტაპზე უფრო შორეულ პერსპექტივას ჰგავს.
რაც შეეხება ჯანოს, ჩვენი სანდო ინფრომაციით, 28 წლის ქართველ ფეხბურთელთან ყინული დაძრულია და თუ ყველაფერი გეგმის მიხედვით წარიმართა, მისი „დინამოში“ თამაში რეალურია.
„დინამოს“ ერთგვარი პირობა კი ასეთია. თუ ჯანო ანანიძეს ტრავმა არ ექნება და სეზონის დაწყებამდე საოპერაციო არ გახდება, უფრო რომ დავკონკრეტდეთ სასურველ ფიზიკურ ფორმაში იქნება, მაშინ წესით მის გადინამოელებას წინ არაფერი უნდა დაუდგეს.
შეგახსენებთ, ბოლოს ჯანო ანანიძე ვოლგოგრადის „როტორში“ ირიცხებოდა, თუმცა გუნდიდან ისე წამოვიდა მოედანზე ერთხელაც არ გასულა.
ამჟამად, ანანიძე უგუნდოდაა და წესით და რიგით, არც მისთვის და არც „დინამოსთვის“ ამ საქმის მოკვარახჭინება ურიგო არ უნდა იყოს.
