სანამ ისინი ფეხბურთს თამაშობენ, მათ სპორტულ ქიშპობას დასასრული არ ექნება. რონალდო და მესი. თანამედროვე ფეხბურთის ორი სუპერვარსკვლავი, რომელთაც სასწაული ეპოქა შექმნეს.
ახლახანს, მესიმ პელეს რეკორდი გაიმეორა, რაც ერთი გუნდის მაისურით გატანილი გოლების აროდენობას (643) ეხება და ეჭვგარეშეა, რომ სულ მალე მას დაამხობს.
კრიშტიანო რისი კრიშტიანოა თუ მას არ უპასუხა. ცოტაც და საფეხბურთო სამყარო კიდევ ერთი უნიკალური რეკორდის შესახებ შეიტყობს, რომლის შემოქმედიც პორტუგალიელი ფეხბურთელი გახდება. საქმე კი ოფიციალურ მატჩებში გატანილ გოლებს ეხება. როლანდოს, ყველა დროის საუკეთესო მაჩვენებლამდე სულ რაღაც 4 გოლი აშორებს.
ჯერ-ჯერობით კი ძალაშია ავსტრიელი ფეხბურთელის იოზეფ ბიკანის რეკორდი, რომელმაც კარიერის უმთავრესი ნაწილი ვენის „რაპიდსა“ და პრაღის „სლავიაში“ გაატარა, ჯამში კი ოფიციალურ მატჩებში 759 გოლის გატანა შეძლო. მეორეზე 757 გოლით ლეგენდარული პელეა, რაც შეეხება კრიშტიანოს, მან იტალიის ჩემპიონატის მე-13 ტურში, „პარმას“ კარში დუბლი შეასრულა და 756 გოლი დაუგროვდა.
მოკლედ, ალბათ ეჭვი არავის ეპარება, რომ კრიშტიანო რონალდო საფეხბურთო ისტორიის ახალ ფურცელს დაწერს.
