საქართველოს წყალბურთელთა ნაკრები ევროპის 2022 წლის ჩემპიონატის საკვალიფიკაციო ეტაპის სამ საკვალიფიკაციო მატჩს თბილისში გამართავს. პირველ შეხვედრაში ქართველები ბელარუსს დაუპირისპირდნენ და ფავორიტის სტატუსი გაამართლეს – 25:5 გაიმარჯვეს.
დეიან სტანოიევიჩის გაწვრთნილმა გუნდმა ბელარუსებთან პირველივე პერიოდში მოიპოვა გადამწყვეტი უპირატესობა და შეხვედრა მშვიდად მიიყვანა გამარჯვებამდე.
19 თებერვალს ქართველების მეტოქე პოლონეთი იქნება, ხოლო 20-ში – სლოვაკეთი. ევროპის ჩემპიონატის ფინალურ ეტაპზე თამაშის უფლებას პირველ და მეორე ადგილზე გასული ნაკრებები მოიპოვებენ.
2022 წლის ვეროპის ჩემპიონატის ფინალური ეტაპი 27 აგვისტოდან 10 სექტემბრამდე ხორვატიაში გაიმართება. ქალაქ სპლიტში ევროპის ჩემპიონის ტიტულისთვის ბრძოლაში 16 გუნდი ჩაერთვება, რვა მათგანის ვინაობა დიდი ხანია ცნობილია. ესენი არიან ევროპის 2020 წლის ჩემპიონატზე პირველ რვა ადგილზე გასული ნაკრებები: უნგრეთი, ესპანეთი, მონტენეგრო, ხორვატია, სერბეთი, იტალია, საბერძნეთი და რუსეთი.
მომზადებულია 1TV.GE-ის მიხედვით
