კვიპროსის საფეხბურთო ჩემპიონატის მორიგ ტურში ქართველების „აპოელი“ ტურნირის ერთ-ერთ ლიდერს, ლარნაკას აეკ-ს დაუპირისპირდა და მინიმალური ანგარიშით, 1:0 დაამარცხა.
მატჩის გმირი გიორგი ქვილითაია გახდა, რომელმაც პირველი ტაიმის მიწურულს, მსაჯის მიერ დამატებულ დროში თერთმეტმეტრიანი ზუსტად გამოიყენა. საგულისხმოა, რომ პენალტი თავად ქვილითაიამ მოიპოვა და შემდეგ შედეგიანადაც შეასრულა.
რაც შეეხება მურთაზ დაუშვილს და თორნიკე ოქრიაშვილს, ისინი მოედანზე მეორე ნახევარში, შეცვლაზე შემოვიდნენ.
„აპოელი“ 20 ტურის შემდეგ კვიპროსის ჩემპიონატის სატურნირო ცხრილში 36 ქულით მეორე ადგილზე იმყოფება და ლიდერ აპოლონს 8 ქულით ჩამორჩება.
რაც შეეხება გიორგი ქვილითაიას, 28 წლის თავდამსხმელმა გოლი ზედიზედ მეოთხე შეხვედრაში გაიტანა, საერთო ჯამში კი მიმდინარე სეზონში 8 გოლი დაუგროვა.
