კვიპროსის ჩემპიონატის მე-20 ტურში, „აპოელი“ აელ-ს ესტუმრა და დაძაბულ ბრძოლაში 2:3 დაამარცხა. საგულისხმოა, რომ მატჩის გმირი გიორგი ქვილითაია გახდა, რომელმაც მეტოქის კარში დუბლის შესრულება შეძლო.
მურთაზ დაუშვილმა და გიორგი ქვილითაიამ შეხვედრა სასტარტო შემადგენლობიდან დაიწყეს, თორნიკე ოქრიაშვილი კი მოედანზე 26-ე წუთზე შემოვიდა.
ლიმასოლში გამართულ შეხვედრაში ანგარიშის გახსნა მასპინძლებს მე-11 წუთზე შეეძლოთ, მაგრამ პენალტი ვერ გამოიყენეს თუმცა, ეს მე-18 წუთზე მაინც მოახერხეს, მეტოქის დარტყმული ბურთი დაუშვილს მოხვდა და ანგარიში გაიხსნა – 1:0. 21-ე წუთზე ანგარიში ქვილითაიამ გაათანაბრა. მაგრამ აელ-ი 35-ე წუთზე ნიკალე მილინჩეანუმ მეორედ დააწინაურა.
„აპოელმა“ მეტოქე მეორე ტაიმში გატეხა – 66-ე წუთზე ხორვატმა ანტონ მაგლიცამ წონასწორობა აღადგინა. 74-ე წუთზე ქვილითაიას რეალური საგოლე შანსი ჰქონდა მაგრამ ცარიელ კარს ააცილა. თუმცა, ერთ წუთში შეცდომა გამოასწორა, უფრო რთული პოზიციიდან გადამწყვეტი გოლი გაიტანა და გუნდს გამარჯვება მოუტანა 2:3.
20 ტურის შემდეგ „აპოელმა“ 30 ქულა დააგროვა და მე-4 ადგილზე დაწინაურდა. აღსანიშნავია, რომ „აპოელის“ ქართველმა თავდამსხმელმა ბოლო 6 მატჩში 6 გოლი გაიტანა, სულ კი 17 მატჩში 7 გოლი დაუგროვდა და კვიპროსის ჩემპიონატის საუკეთესო ბომბარდირთა ხუთეულშია.
