უხვგოლიანი თრილერი დინამო არენაზე

7 გოლი ერთ მატჩში. იყო მერვეც, თუმცა ბოლო წუთებზე „საბურთალოს“ გატანილი გოლი გაუქმდა, არადა ანგარიში თანაბრდებოდა.

ისე კი „დინამომ“ დაძაბულ დაპირისპირებაში 4:3 იმარჯვა. ეს იყო „დინამოს“ ბოლო მატჩი მთავარი მწვრთნელის გარეშე. გეცოდინებათ, ეთიკის და სადისციპლონო კომიტეტმა, გიორგი ნემსაძეს ეროვნული ლიგის პირველივე ტურში 3 მატჩიანი დისკვალიფიკაცია გამოუწერა, რომლის სასჯელის ვადაც ამოიწურა.

მთავარი მწვრთნელის გარეშე კი „დინამომ“, მეოთხე ტურში „საბურთალოს“ უმასპინძლა და გულშემატკივარმაც ტელეეკრანებთან თვალსასეირო, დაძაბული და უხვგოლიანი თრილერი იხილა.

დუბლი გაიფორმა „დინამოელთა“ სერბმა ლეგიონერმა მარუშიჩმა, რომელსაც „საბურთალოს“ რიგებიდან შოთა ნონიკაშვილმა ასევე ორი გოლით უპასუხა და ტაიმიც ფრედ – 2:2 დასრულდა.

მეორე ნახევარიც არანაკლებ საინტერესო საყურებელი გამოდგა. ჯერ გიორგი გაბედავამ პენალტით, შემდეგ კი გიორგი პაპავამ შორეული გასროლით „დინამო“ სოლიდური უპირატესობით დააწინაურა. „საბურთალომ“ კიდევ ერთხელ გაიბრძოლა და იური ტაბატაძემ ანგარიში შეამცირა.

მომდევნო ტურში „დინამო“ 20 მარტს თელავში ითამაშებს, „საბურთალო“ კი ბათუმს მიიღებს.