დიდი მარჩიელობა საჭირო ნამდვილად არ იყო თუ როგორი იქნებოდა როინ კვასხვაძის მომავალი. საქათველოს ნაკრების და თბილისის „დინამოს“ ყოფილმა მეკარემ დედაქალაქური გუნდი მას შემდეგ დატოვა, რაც კახა ცხადაძის შეგირდებმა ჩემპიონთა ლიგის საკვალიფიკაციო ეტაპის პირველ წრეში ბაქოს „ნეფჩის“ ბარიერი ვერ გადალახა.
ქართული ფეხბურთის ფლაგმანმა აზერბაიჯანის ჩემპიონთან ორი მატჩის ჯამში 2:4 წააგო. თბილისშიც და ბაქოშიც „დინამო“ ერთნაირი ანგარიშით 1:2 დამარცხდა, ხოლო როინ კვასხვაძემ რამდენიმე უპატიებელი შეცდომა დაუშვა, რაც საბოლოოდ საკუთარ კარში გაშვებული გოლებით დასრულდა.
„ნეფჩისთან“ წარუმატებელი მატჩების შემდეგ, „დინამომ“ როინ კვასხვაძესთან კონტრაქტი ურთიერთშეთანხმების საფუძველზე გაწყვიტა, თუმცა 32 წლის კიპერი უგუნდოდ დიდხანს არ დარჩენილა. მოხდა ის, რაც მოსალოდნელი იყო – როინ კვასხვაძე მშობლიურ კლუბს ქუთაისის „ტორპედოს“ უბრუნდება.
