ჩემპიონთა ლიგის ფინალი სტამბულში აღარ გაიმართება. შეგახსენებთ, თურქეთს ევროპის ყველაზე პრესტიჟული საკლუბო ტურნირის ფინალისთვის ჯერ კიდევ შარშან უნდა ემასპინძლა, თუმცა მაშინ პანდემიის გამო უეფას ფორმატის შეცვლა ფორსმაჟორულ ვითარებაში მოუხდა და დასკვნითი ეტაპიც, ფინალის ჩათვლის ლისაბონში ჩაატარა.
სტამბულს ჩემპიონთა ლიგის ფინალის მასპინძლობა არც წლეულს ეღირსა. მიზეზი კი ისევ კორონავირუსია, რომელიც თურქეთში საგანგაშოდ მძვინვარებს, ხოლო გაერთიანებული სამეფოს მთავრობის რეგულაციების მიხედვით თურქეთი წითელ ზონაშია მოხვედრილი.
უეფამაც ცვლილებები ამიტომაც გადაწყვიტა და სტამბულს ფინალის მასპინძლობა, სადაც ერთმანეთს ორი ინგლისური გრანდი – „ჩელსი“ და „მანჩესტერ სიტი“ დაუპირისპირდება ჩამოართვა.
საბოლოოდ კი ჩემპიონთა ლიგის მიმდინარე სეზონის გადამწყვეტი მატჩის ადგილად პორტუგალია, კერძოდ კი ქალაქი პორტუ შეირჩა.
პორტუს სტადიონ „ესტადიო დრაგაუზე“ ორივე გუნდის ქომაგებისთვის 6-6 ათასი ბილეთი გამოიყოფა. ფინალური მატჩი 29 მაისს გაიმართება.
