“მანჩესტერ სიტის” და საქართველოს ეროვნული ნაკრების ყოფილმა ფეხბურთელმა, გიორგი ქინქლაძემ განმარტა, თუ რატომ არ უნდოდა წასვლა ქალაქელების რიგებიდან.
“ვერ მოვიტყუები და გიდასტურებთ, რომ რამდენიმე კლუბიდან შემოთავაზებები მქონდა. ფეხბურთელის გადმოსახედიდან შეიძლება წავსულიყავი და უფრო სხვანაირად განვითარებულიყო ჩემი კარიერა, მაგრამ ადამიანური თვალსაზრისით მე ჩაძირული გემიდან ვერ გადმოვხტებოდი. მანჩესტერელებმა იმხელა სიყვარული, სითბო და მხარდაჭერა მომანიჭეს, რომ ერთი წამითაც არ მიფიქრია სხვაგან წასვლა. ყოველ შემთხვევაში ვცდილობდი, რომ “მანჩესტერ სიტის” გულით მივხმარებოდი”, – ამბობს ქინქლაძე.
შეგახსენებთ, რომ 1995 წლის ივლისში, გიორგი ქინქლაძე “მანჩესტერ სიტიმ” “დინამო თბილისისგან” იყიდა.
მან “მეინ როუდზე” სამი სეზონი გაატარა და შემდეგ ინგლისურმა კლუბმა “აიაქსში” გაყიდა.
გიორგი ქინქლაძე მანჩესტერში დღემდე ყველაზე დაფასებული ფეხბურთელია მიუხედავად იმისა, რომ მას შემდეგ “სიტის” არაერთი ვარსკვლავი ჰყოლია.
აქვე გეტყვით, რომ გიორგი ქინქლაძის ტრანსფერით ერთ დროს, “ლივერპული”, “ბარსელონა”, მადრიდის “რეალი” და სხვა ევროპული გრანდები იყვნენ დაინტერესებული.
