30 ივლისს ტოკიოს 32-ე ოლიმპიურ თამაშებზე 4 ქართველი სპორტსმენი იასპარეზებს.
გურამ თუშიშვილის პირველი მეტოქე კუბელ გრანდასა და ტაჯიკ რახიმოვს შორის გაირკვევა. წარმატების შემთხვევაში, მისი და ტურნირის მთავარი ფავორიტის ტედი რინერის გზები ნახევარფინალურ სტადიაზე გადაიკვეთება. წინასწარი შეხვედრები თბილისის დროით 06:00-დან დაიწყება.
საქმეში 26 წლის ბირთვის მკვრელი სოფიკო შათირიშვილი ჩაერთვება. ქართველის სპორტსმენი B ჯგუფში იასპარეზებს და შეჯიბრი 14:25-ზე დაიწყება.
ლეგენდარული ტყვიის მსროლელი ნინო სალუქვაძე ოლიმპიურ თამაშებზე ბოლოჯერ იასპარეზებს. 52 წლის სალუქვაძე ხვალ 04:00-ზე საკვალიფიკაციო ეტაპის დასკვნით ეტაპს ჩაატარებს. წარმატების შემთხევაში ის 8 საუკეთესო სპორტსმენს შორის მოხვდება და ფინალურ სტადიაზე იასპარეზებს.
23 წლის ესკერხან მადიევი მეოთხედფინალურ შეხვედრას რუსეთის ოლიმპიური კომიტეტის წარმომადგენელ ანდრეი ზამკოვოის წინააღმდეგ გამართავს. მისი შეხვედრა თბილისის დროით 13:51-ზე დაიწყება.
შეგახსნებთ, რომ 6 დღის შემდეგ საქართველოს დელეგაციას 3 მედალი აქვს. ძიუდოში -90 კილოგრამში ჩემპიონი ლაშა ბექაური გახდა, -73 კილოგრამში ლაშა შავდათუაშვილმა და -66 კილოგრამში ვაჟა მარგველაშვილმა ვერცხლის მედლები მოიპოვეს.
