2020 წლის იმ შავი ნოემბრის შემდეგ, საქართველოს ნაკრები უმწვრთნელოდაა. ვლადიმირ ვაისს შეეძლო გმირი გამხდარიყო და ქართული ფეხბურთის ისტორიაში ოქროს ასეობით ჩაწერილიყო, მაგრამ მიიღო სრული კრახი თანამდებობის თავჩაქინდრული დატოვება.
მას შემდეგ კი ჯვაროსნები უთავკაცოდ არიან. ეროვნული ნაკრების მწვრთნელის საკითხი კი იმდენად სენსიტიური თემაა, ფეხბურთზე სრულიად ინდეფერენტულად განწყობილ ადამიანსაც რომ დააინტერესებს. აღარაფერს ვამბობთ თავგადაკლულ ქომაგებზე და თუნდაც მედიაზე, რომლებიც ამ მხრივ უკვე მესამე თვე დაიწყო, რაც ინფორმაციულ ვაკუუმსა და შიმშილში იმყოფებიან.
ქართველი თუ უცხოელი? არის ბჭობა და ვარაუდები. კულუარულად, ჭორის დონეზე ერთმა კანდიდატმაც გაიჟღერა – სერგეი რებროვმა.
ახლო წარსულში გამოჩენილ უკრაინელ ფეხბურთელს ალბათ წარდგენა არ უნდა სჭირდებოდეს. რებროვმა კიევის „დინამოში“ და უკრაინის ნაკრებში, ანდრეი შევჩენკოსთან ერთად დიდებული ტანდემი შექმნა და გრანდებსაც ხშირად ამწარებდნენ.
რაც შეეხება სამწვრთნელო კარიერას, 46 წლის რებროვს სანაკრებო დონეზე არასოდეს უმუშავია, თუ არ ჩავთვლით მცირე ხნით უკრაინის ნაკრებში ასისტენტობას. საკლუბო დონეზე კი არაერთ კლუბში მოუსინჯავს ძალები. მათ შორის მშობლიურ კიევის „დინამოში“, შემდეგ არაბულ „ალ-ახლიში“, ამჟამად კი უნგრულ „ფერენცვაროშს“ ავარჯიშებს, სადაც ჩვენებური ლაშა დვალი თამაშობს.
კულუარული ინფორმაციით, საქართველოს ფეხბურთის ფედერაციას სერგეი რებროვთან კონტქატი ჰქონდა და მას ნაკრების მთავარი მწვრთნელობა შესთავაზა, თუმცა უკრაინელმა სპეციალისტმა თავაზიანი უარით გაისტუმრა.
მსოფლიო ჩემპიონატის შესარჩევი ეტაპის დაწყებამდე ბევრი დრო აღარ რჩება.
