ქართველმა წყალბურთელებმა „ტოკიო 2020“-ის როტერდამული სალიცენზიო ტურნირი კანადასთან გამარჯვებით და მეშვიდე ადგილით დაასრულეს.
ჩვენი წყალბურთელები კანადელებს მეორედ დაუპირისპირდნენ და სასიხარულოა, რომ ორივე შემთხვევაში საქართველოს ნაკრებმა საგრძნობი უპირატესობით იმარჯვა. პირველ ჯერზე კანადას ჯგუფურ ეტაპზე გადავეყარეთ და მაშინ საქართველოს ნაკრებმა მეტოქეს 14:11 აჯობა, მეორედ კი მეშვიდე ადგილისთვის შეხვედრაში, რომელშიც გაცილებით დიდი სხვაობით – 18:10 გავიმარჯვეთ.
შეგახსენებთ, საქართველოს წყალბურთელთა ნაკრებს ისტორიული შანსი ჰქონდა გამხდარიყო დამოუკიდებლობის შემდეგ პირველი სათამაშო სახეობა, რომელიც ზაფხულის ოლიმპიურ თამაშებზე იასპარეზებდა.
სამწუხარო, ეს ვერ მოხერხდა. საქართველოს ნაკრებმა ჯგუფური ეტაპი კი გადალახა, მაგრამ შემდეგ პლეიოფში მრისხანე ხორვატიას გადაეყარა და უშანსოდ დამარცხდა.
