22 წლის სანდრო მამუკელაშვილმა “მაიამისთან” მატჩში 27:20 წუთი ითამაშა და ამ დროში 12 ქულა, 4 მოხსნა და 1 პასი მიითვალა. საბოლოოდ მილუოკი “მაიამისთან” ფლორიდაში 42-ქულიანი სხვაობით 137:95 დამარცხდა.
სანდრო თამაშში პირველ მეოთხედში გამოჩნდა, რომლის დასასრულსაც მას 4 ქულა და ამდენივე მოხსნა ჰქონდა და ამ მაჩვენებლებით გუნდში საუკეთესო იყო.
მატჩის შემდეგ პრესკონფერენციაზე მაიკ ბუდენჰოლცერსთსნ ერთად სანდრომაც ისაუბრა.
“ჩემთვის ეს იყო დიდი შესაძლებლობა. გახარებული ვარ, რადგან მწვრთნელი მენდო და ვარსკვლავებთან ერთად გამიყვანა მოედანზე. დღევანდელი თამაში ჩემთვის კარგი გამოცდილებაა, რომლისგანაც ბევრს ვისწავლი. დღეს მაიამიმ საოცრად ითამაშა, ჩვენი პასუხი კი დაგვიანებული აღმოჩნდა. წინ კიდევ 80 მატჩია. მომდევნო ვარჯიშებზე და თამაშებზე შევეცდებით, ყველა შეცდომის გამოსწორებას. ძალიან კონკურენტუნარიანი გუნდი გვყავს, არ აქვს მნიშვნელობა რა მოხდება, გუნდი ერთიანია და ბოლომდე იბრძოლებს.
პირადად მე ამ ყველაფერს აუცილებლად გამოვიყენებ, რომ უფრო მეტი ვივარჯიშო და უკეთესი მოთამაშე გავხდე, მოვუმატო ფიზიკურად და ვიყო მომთმენი. მართალია, ჩემთვის ყველაფერი კარგად აეწყო, მაგრამ ვერ ვზეიმობ, რადგან გუნდი დამარცხდა. რა თქმა უნდა, არ დავმალავ, რომ ბედნიერი ვარ. ვიცი, რომ წინ კიდევ დიდი გზაა. უკეთ უნდა ვიგრძნო NBA. სამწვრთნელო შტაბის მადლობელი ვარ ნდობისთვის და შანსის მოცემისთვის. მადლობა გუნდელებს, რომელთაც სჯერათ ჩემი. რომ ახალბედას მომცეს თავის გამოჩენის შანსი. ჩემი აზრით, როცა ბევრს შრომობ, ეს შედეგს ყოველთვის გამოიღებს. შევეცდები, რომ მზად ვიყო ყოველ ჯერზე, როცა მწვრთნელი ჩემს გვარს გამოაცხადებს. NBA-ში საოცარი სისწრაფეები და ფიზიკურობაა, ამას ფეხი უნდა ავუწყო”, – განაცხადა სანდრომ.
24 ოქტომბერს “მილუოკი” “სან ანტონიოს” ესტუმრება, შეხვედრა თბილისის დროით 04:30-ზე დაიწყება.
