უეფას კონფერენსლიგის მე-3 საკვალიფიკაციო ეტაპის საპასუხო მატჩში დღეს „დინამო ბათუმი“ თურქეთში „სივასპორს“ დაუპირისპირდება. თამაშამდე თურქული კლუბის მთავარმა მწვრთნელმა, რიზა ჩალიმბაიმ პრესკონფერენცია გამართა და ბათუმური კლუბის მიმართ საქებარი სიტყვები არ დაიშურა:
„ისინი ჩვენზე მეტად არიან მომზადებული თამაშის რიტმის თვალსაზრისით. ეს გუნდი სახიფათოა და განსაკუთრებით სტუმრად ძალიან კარგად თამაშობს, ამიტომ შესაბამის ზომებს მივიღებთ. თუ არ ვიბრძლებთ, თუ თამაშში ჩართული არ ვიქნებით, თუ ჩვენი დისციპლინა დაირღვევა, შეიძლება პრობლემები შეგვექმნას. ჩემი აზრით, ძალიან რთული და დაძაბული თამაში იქნება. ყველა ასეთ მატჩს ვუყურებთ, როგორც ეროვნული მნიშვნელობის მატჩს და ვითამაშებთ ჩვენი ქვეყნისთვის, საკუთარი თავისთვის და გულშემატკივრებისთვის, რომელთაგანაც ახლა შორს ვართ. ყველაფერს გავაკეთებთ მოედანზე გამარჯვებისთვის. ახლა უკვე კარგად ვიცნობთ „დინამო ბათუმს“ და მათ ფეხბურთელებს.
მოსაგებად ყველაფერს გავაკეთებთ, გვაქვს უპირატესობა, მაგრამ რა თქმა უნდა, ამას ყურადღებას არ ვაქცევთ. ერთადერთი მიზანი ჩვენი ფანების გამარჯვებით გახარებაა და ერთადერთი საზრუნავიც გამარჯვებაა. ყველაფერს გავაკეთებთ, რომ ევროთასებსა და ჩემპიონატში კარგად ვიასპარეზობთ. თუ ამ ეტაპს გავივლით, წინ ძალიან ინტენსიური თამაში გველოდება. რთული იქნება, მაგრამ ჩემი გუნდის მთელი გულით მჯერა. უეცარი ტრავმები ერთადერთია, რისიც მეშინია. თუ მსგავსი რამ არ მოხდება, მჯერა, რომ გუნდს კარგად თამაში ნებისმიერ ტურნირზე შეუძლია“, – განაცხადა ჩალიმბაიმ.
შეგახსენებთ, რომ „დინამო ბათუმისა“ და „სივასპორის“ საპასუხო დაპირისპირება 12 აგვისტოს გაიმართება. წყვილში გამარჯვებული კონფერენსლიგის საკვალიფიკაციო პლეი ოფში „კოპენჰაგენსა“ და პლოვდიდის „ლოკომოტივს“ შორის მოგებულს შეხვდება.
