ლიტვის დედაქალაქ ვილნიუსში გამართულ საერთაშორისო ახალგაზრდულ ტურნირზე – Ateitis CUP 2022-ზე “დინამო ბათუმის” 17-წლამდელთა გუნდმა მე-3 ადგილი დაიკავა.
ბათუმური კლუბი ერთი კვირის განმავლობაში ვილნიუსში იმყოფებოდა, სადაც ყველა პირობა იყო შექმნილი როგორც სავარჯიშო პროცესისთვის, ასევე დასვენებისა და სრულფასოვანი კვებისათვის.
აღნიშნულ ტურნირზე მონაწილეობას 5 გუნდი იღებდა – FC Future, FM Ateitis, Fa Ateitis, Zaibas, Daugava, სადაც ბათუმელმა ფეხბურთელებმა ჯამში 8 ქულა დააგროვეს. მათ ანგარიშზე 2 მოგება, 2 ფრე და 1 მარცხია.
აღსანიშნავია, რომ “ზაიბასთან” შეხვედრაში ბათუმელმა ფეხბურთელებმა გატანილი გოლის შემდეგ უკრაინის დროშა გაშალეს და მეგობარ ქვეყანას სოლიდარობა გამოუცხადეს.
Ateitis CUP 2022-ზე “დინამო ბათუმის” 17-წლამდელთა გუნდიდან ერთ-ერთი გამორჩეული ფეხბურთელი 16 წლის ნახევარმცველი, ანრი ფარსენაძე გახლდათ, რომელმაც 5-ვე მატჩი ძირითად შემადგენლობაში ითამაშა, ერთი გოლი გაიტანა და ერთი საგოლე გადაცემა გააკეთა.
“პრაიმ სპორტის” გუნდი ანრის დაუკავშირდა და ვილნიუსში გამართული საერთაშორისო ტურნირიდან ემოციები გაგვიზიარა.
– პირველ რიგში გილოცავთ მესამე ადგილზე გასვლას! როგორ შეაფასებდით Ateitis CUP 2022-ზე გამოსვლას?
– მადლობა! ძალიან კარგი ტურნირი იყო ძლიერი გუნდებით და დაძაბული თამაშებით. ბიჭებმა ტურნირზე მაქსიმუმი გავაკეთეთ… ჩვენი მიზნები და მოლოდინი უფრო დიდი იყო, მაგრამ ამჯერად მე-3 ადგილს დავჯერდით. როგორც ყველამ ასევე მეც გუნდისთვის ყველაფერი გავაკეთე.
– მესამე ადგილისთვის ბრძოლაში რა გზა გაიარეთ?
– დაძაბული და დრამატული მატჩები ვითამაშეთ, სადაც მაქსიმალურად ვეცადეთ, რომ სასურველი შედეგი დაგვეფიქსირებინა.
– როგორ ფიქრობ, ქომაგების იმედი გაამართლეთ?
– როგორც არ უნდა ვითამაშო, კმაყოფილი არასდროს არ ვარ. ჩემ გვერდზე მყოფი ადამიანები ყოველთვის მამხნევებენ და ჩემში სულ დადებითს ხედავენ.
– იგეგმება თუ არა კიდევ მსგავსი ტურნირები?
– ახლო მომავალში საქართველოს ჩემპიონატზე გამოვალთ, სადაც უმაღლესი მიზნებისთვის ვიბრძოლებთ. როგორც მე მაქვს ინფორმაცია, ჯერჯერობით საზღვარგარეთ მსგავსი ტურნირები არ არის დაგეგმილი.
– ბათუმის “დინამოში” თამაში როგორი პასუხისმგებლობაა?
– დიდი პასუხისმგებლობაა… როგორც ყველა ბათუმელის ასევე ჩემი სურვილიცაა, რომ უმაღლესი გუნდის წევრი გავხდე და ბათუმის “დინამოს” ღირსება საერთაშორისო ასპარეზზე დავიცვა. ამისთვის ყველაფერს გავაკეთებ…
– Ateitis CUP 2022-ზე რომელ მეტოქეს გამოარჩევდით?
– ძალისმიერი გუნდები იყვნენ, რომლებიც ფიზიკური მდგომარეობით და ბრძოლისუნარიანობით გამოირჩეოდნენ. ყველა გუნდი საკმაოდ კარგად გამოიყურებოდა და ასე კონკრეტულად ვერცერთს გამოვარჩევ.
მსგავსი ტურნირები დიდ გამოცდილებას მაძლევს და კარიერის განვითარებაში მეხმარება. ისინი უფრო ფიზიკურ მდგომარეობას ანიჭებდნენ უპირატესობას. ტემპი მაღალი იყო მიუხედავად ტაიმების ხანგრძლივობისა. ეს გუნდები უფრო ძალისმიერ ფეხბურთს თამაშობდნენ, ქართველები კი ტექნიკური არსენალით განვსხვავდებოდით.
– ერთ-ერთი გოლი უკრაინას მიუძღვენით, რას იტყოდით ამის შესახებ?
– ამ აღნიშვნით საქართველოს პოზიცია გამოვხატეთ უკრაინის და უკრაინელი ხალხის მიმართ. ემოციური და ამავე დროს ღირსეული საქციელიც იყო.
– საქართველოში დაბრუნებისას ბათუმელი გულშემატკივარი როგორ დაგხვდათ?
– თბილად დაგვხდნენ.. ჩვენი თამაშით ყველა კმაყოფილი და ამაყია.
ჩვენ “დინამო ბათუმის” ღირსებას ვილნიუსში ვიცავდით და შედეგი ძალიან მნიშვნელოვანია, როგორც ჩვენთვის ისე გულშემატკივრებისთვის.
– მთავარმა მწვრთნელმა რა როლი ითამაშა ამ წარმატებაში?
– ირაკლი ბალაძეს და ედიშერ ანთაძეს როლი დიდი იყო როგორც მოედანზე ისე მის გარეთ. ჩვენ მაქსიმალურად შევეცადეთ მათი დავალებები შეგვესრულებინა, რაც ასე თუ ისე გამოგვივიდა.
– ლიტვის 17-წლამდელთა ნაკრებთან დაპირისპირებას როგორ შეაფასებდი?
– ლიტვის ნაკრებთან ამხანაგური მატჩი ვითამაშეთ, სადაც დავმარცხდით. კარგად მომზადებული გუნდი იყო, ჩვენ დაღლილობის ფონზე ვერ შევასრულეთ დავალებები და ვერ მივაღწიეთ სასურველ მიზანს.
– საოცნებო გუნდი რომელია?
– საოცნებო გუნდი “მილანია”. ჩემი ოცნებები დიდ მოტივაციას მაძლევს… ფეხბურთს ბავშვობიდან ვთამაშობ და ამით დიდ სიამოვნებას ვღებულობ, როგორც ყველამ მეც ეზოში დავიწყე თამაში, რის შემდეგაც “დინამო ბათუმში” მივედი.