ევროპის სუპერლიგის დაარსებას საფეხბურთო სამყაროში ძალზედ მძაფრი რეაქციები მოჰყვა. ალბათ ამიტომაც იყო, რომ ამ პროექტმა შექმნიდან ორ დღეში ფაქტობრივად ფუნქციონირება შეწყვიტა, რადგან იქ გაწევრიანებული 12 გუნდიდან უმეტესობამ იქაურობა მალევე დატოვა.
სუპერლიგის შექმნას არაერთგვაროვანი შეფასებები მოჰყვა ქართულ საფეხბურთო საზოგადოებაშიც. საზოგადოებრივ მაუწყებელზე, გადაცემა „ტაიმაუტის“ სტუმარი იყო რეზი არველაძე, რომლის აზრიც ვფიქრობთ გულშემატკივრებისთვის უინტერესო არ უნდა იყოს.
“ევროპის სუპერლიგის საკითხს ორად გავყოფ – ფული და სანახაობა. თუ ამ პროექტს განხორციელება უწერია დიდი შეთანხმებაა საჭირო. შეიძლება სახელმწიფოერბივ დონეზეც. ფეხბურთს უყურებს მთელი სამყარო. ფეხბურთი ფართო მასების ძალიან დემოკრატიული სპორტია. ამ თამაშით მთელი მსოფლიოა მოცული.
ფეხბურთი ყველა სათამაშო სახეობისგან განსხვავდება. ყველაზე ყურებადი სპორტის სახეობაა და ამაში ორი აზრი არ არსებობს.
ეს ყველაფერი ხომ ფულს უკავშირდება, თან დიდ ფულს. ევროპის გრანდი გუნდები ფიქრობენ, რომ ფიფა-უეფა მათთვის იმაზე გაცილებით ცოტა ფულს იმეტებს, ვიდრე ეკუთვნით. ეს ამბებიც ხომ ამიტომ ატყდა.
უეფას კონგრესზე, რომელიც გუშინ ჩატარდა მოწვეული იყო სოკ-ის პრეზიდენტი, ფიფას პრეზიდენტი და უამრავი ადამიანი. საერთოდ არ გამკვირვებია, რომ სუპერლიგას არ დაუჭირეს მხარი. ფეხბურთი მარტო 20 ქვეყნის ან 20 კლუბის ხომ არ არის ? ფეხბურთი ყველასია“ – ამბობს რეზი არველაძე.