ქვიშის ფეხბურთის ევროპის ჩემპიონთა თასზე, რომელიც პორტუგალიაში მიმდინარეობს, საქართველოს ჩემპიონმა ბათუმის “დინამომ” ასპარეზობა წარმატებით დაიწყო. პირველ სათამაშო დღეს ბათუმელები პორტუგალიურ “შოტაო B”-ს დაუპირისპირდნენ და 3:1 დაამარცხეს. ერთი გოლი ფარტენაძემ გაიტანა, შამილაძემ კი დუბლი შეასრულა.
ბათუმის “დინამო” M ჯგუფშია, სადაც შოტაო B-ს გარდა “სპარტაკ ვარნაც” (ბულგარეთი) ასპარეზობს. მომდევნო ეტაპზე ჯგუფის გამარჯვებული და მეორეადგილოსანი გადიან, თუმცა გასვლის შანსი საუკეთესო მესამეადგილოსნებსაც ექნებათ. ბათუმის “დინამო” მომდევნო მატჩს 14 ივლისს, “სპარტაკ ვარნასთან” გამართავს და შეეცდება, ჯგუფში პირველი ადგილი დაიკავოს.
ბათუმის “დინამოს” გარდა, ტურნირზე ასპარეზობს საქართველოს ვიცე-ჩემპიონი “თელავიც”.
ბათუმის “დინამო” საქართველოს ჩემპიონი წელს ზედიზედ მეშვიდედ გახდა. აჭარული კლუბი ევროპის ჩემპიონთა თასზე 2015 წლიდან გამოდის და მას შემდეგ მხოლოდ შარშანდელი, 2020 წლის ასპარეზობა გამოტოვა. ბათუმურმა კლუბმა EWC-ზე საუკეთესო შედეგი 2018 წელს აჩვენა, როდესაც ტურნირის მეოთხედფინალურ ეტაპზე გავიდა.
