კვიპროსის თასზე დღეს ნახევარფინალური ეტაპის საპასუხო შეხვედრები გაიმართა. თემურ ქეცბაიას სეზონის გადარჩენის ერთადერთი შანსი სწორედ ქვეყნის თასზე დარჩა და ქართველი სპეციალისტის გუნდი ამ შანს ღირსეულად ინარჩუნებს.
საპასუხო შეხვედრაში „ანორთოსისი“ „აპოელს“ ესტუმრა. ფამაგუსტელებმა მეტოქეს პირველი შეხვედრა საკუთარ მოედანზე 1:0 მოუგეს და საპასუხო მატჩის წინ მცირე უპირატესობა შეიქმნეს. საბედნიეროდ, განმეორებითი შეხვედრა ქართველების გუნდისთვის წარმატებული გამოდგა და „ანორთოსისმა“ 1:3, ორი მატჩის ჯამში კი 1:4 დაამარცხა და თასის ფინალში თამაშის უფლება მოიპოვა.
დღევანდელ შეხვედრაში მონაწილეობა 4 ქართველიდან სამმა მიიღო. თორნიკე ოქრიაშვილმა, გიორგი ქვილითაიამ და გიორგი ლორიამ მატჩი სასტარტო შემადგენლობაში დაიწყეს და გუნდის წარმატებაში მნიშვნელოვანი წვლილი შეიტანეს. ოქრის და ქვილითაიას გოლები არ გაუტანიათ, თუმცა რამდენიმე საკვანძო ეპიზოდში მიიღეს მონაწილეობა. თემურ ქეცბაიამ ქვილითაია 64-ე წუთზე შეცვალა, ოქრიაშვილმა და ლორიამ კი შეუცვლელად ითამაშეს.
ფამაგუსტელები მატჩის 25-ე წუთზე ჰუსბაიერის გოლით დაწინაურდნენ. 37-ე წუთზე მასპინძლებმა წონასწორობა გარნერის გოლით აღადგინეს, ტაიმის მიწურულს, მსაჯის მიერ დამატებულ მე-3 წუთზე კორეამ „ანორთოსისის“ სასარგებლოდ მეორე გოლი გაიტანა, რამაც ქეცბაიას გუნდს პირველი ნახევარი 1:2 მოაგებინა.
მეორე ტაიმში, 75-ე წუთზე კორეამ დუბლი შეასრულა და სხვაობა 2-ბურთამდე გაზარდა. დარჩენილ დროში ანგარიში აღარ შეცვლილა და ფამაგუსტელებმა საბოლოოდ 1:3 გაიმარჯვეს.
ფინალში თემურ ქეცბაიას გუნდის მეტოქე ნიქოზიას „ოლიმპიაკოსი“ იქნება, რომელმაც თავისმხრივ „აელ ლიმასოლი“ ორი მატჩის ჯამში 2:5 დაამარცხა. ფინალური დაპირისპირების თარიღი ჯერჯერობით უცნობია, თუმცა, მანამდე 26 აპრილს გუნდები ერთმანეთს კვიპროსის ჩემპიონატში შეხვდებიან და ერთმანეთის ძალებს მოსინჯავენ.
