UFC Vegas 22-ზე ქართველი გულშემატკივრების მთავარ ინტერესს ბუნებრივია რომან დოლიძის ორთაბრძოლა იყო. „კავკასიელი“ პირველი ქართველი მებრძოლია, რომელიც 2021 წელს ოქტაგონზე წარსდგა.
სამწუხაროდ, 32 წლის ქართველი მებრძოლისთვის საშუალო წონით კატეგორიაში დებიუტი წარუმატებელი აღმოჩნდა. დოლიძის მეტოქე ამერიკელი ტრევინ ჯაილსი იყო, რომელსაც MMA-ში მოგება-წაგებათა ბალანსი 13:2-ზე ჰქონდა, რომანი კი ორთაბრძოლას დაუმარცხებლის სტატუსით შეხვდა – 8:0-ზე
შეხვედრა საკმაოდ დაძაბული გამოდგა. პირველი რაუნდი ქართველი მებრძოლის უპირატესობით დაიწყო და ბოლომდე დამაჯერებლად მიიყვანა, მეორე პერიოდში კი ინიციატივა ხელთ ტრევინ ჯაილსმა იგდო. ამერიკელმა დოლიძეს რამდენიმე ძლიერი დარტყმა მიაყენა და რაუნდიც გამარჯვებით ჩაამთავრა. რაც შეეხება გადამწყვეტ რაუნდს, აქ ფაქტობრივად ტოლ-სწორი ბრძოლა ვიხილეთ. მიუხედავად იმისა, რომ ჯაილსმა ქართველი მებრძოლი ნოკ დაუნში გაუშვა, დოლიძემაც რამდენიმე ძლიერი საპასუხო დარტყმა მიაყენა. თუმცა, მთავარი ფაქტორი, რამაც ქართველ მებრძოლს ხელი შეუშალა დაღლილობა იყო, რომელმაც განსაკუთრებით დასკვნით ორ წუთში იჩინა თავი. საბოლოოდ, ვერდიქტი მსაჯებმა გამოიტანეს და გამარჯვება ტრევინ ჯაილს მიანიჭეს.
ამრიგად, შერეულ საბრძოლო ხელოვნებაში 32 წლის რომან დოლიძემ პირველი მარცხი იწვნია და მისი ბალანსი 8:1-ზე გახდა. იმედი ვიქონიოთ, რომ „კავკასიელი“ ამ მარცხის შემდეგ უფრო ძლიერი დაბრუნდება და საჩემპიონო რბოლაშიც ჩაერთვება.
