„მანჩესტერ სიტი“ ჩემპიონთა ლიგის მეოთხედფინალშია. პეპ გვარდიოლა უკვე მერამდენედ ცდილობს „ქალაქელებთან“ ერთად ევროპის ყველაზე პრესტიჟული საკლუბო ტურნირი მოიგოს.
ვნახოთ, რა იქნება ამჯერად. ჯერჯერობით კი „სიტი“ იდეალურად ასპარეზობს და აგერ მომდევნო ეტაპზეც ყოველგვარი დაძაბულობის გარეშე გავიდა.
პეპ გვარდიოლას გუნდმა „გლადბახს“ განმეორებით დაპირისპირებაშიც აჯობა და 2:0 მოუგო. გოლები კევინ დე ბრუინმა და გიუნდოგანმა გაიტანეს.
აი, რა თქვა მატჩის შემდეგ პეპ გვარდიოლამ.
„მთელი გუნდით კმაყოფილი ვარ. ყველა რგოლმა შესანიშნავად ითამაშა. ჩემპიონთა ლიგა ჩვენთვის უმთავრესი პრიორიტეტია.
მოხარულები ვართ, რომ მეოთხედფინალში გავედით. ახლა სანაკრებო პაუზის დროა და დანარჩენზე გუნდში მსჯელობა ამის შემდეგ გვექნება.
კონკრეტულად ამ მატჩს რაც შეეხება, მეტოქეს იოლად ვაჯობეთ, რაც მაქსიმალური კონცენტრაციით იყო განპირობებული.
სეზონი გრძელია და ყველა ტურნირზე წარმატების მისაღწევად ხანდახან როტაციასაც მივმართავთ. კარგია, რომ ახლა ამის შესაძლებლობა გვაქვს, რადგან გუნდში თითქმის ყველა ფეხბურთელი მწყობრშია. ოქტომბრის შემდეგ ნორმალურად არც დაგვისვენია.“
