საქართველოს ნაკრების ყოფილმა მწვრთნელა შესაძლოა ნავსაყუდელი შეიცვალოს. ამის შესახებ ებრაული გამოცემები აქტიურად იუწყებიან.’
თემურ ქეცბაიამ, ჯერ-ჯერობით თავის სამწვრთნელო კარიერაში ყველაზე ხელშესახებ წარმატებას იმ კლიბში მიაღწია, სადაც ამჟამად იმყოფება – „ანართოსისში“, როდესაც კვიპროსული გუნდი ჩემპიონთა ლიგის ჯგუფში გაიყვანა და იქაც თავი არ შეურცხვენია.
შემდეგ იყო საქართველოს ნაკრების მესაჭეობა, ბერძნული „ოლიმპიაკოსი“ და ისევ ნაცნობ კლუბში დაბრუნება. ქეცბაიამ „ანართოსისში“ რამდენიმე ქართველი ფხბურთელიც წაიყვანა. ამჟამად მისი გუნდი, კვიპროსის ჩემპიონატში მესამე ადგილზეა და ჩემპიონობის კარგი შანში აქვს, თუმცა სეზონის დასრულებამდე ჯერ კიდევ დროა.
ახლა კი ცნობა, რომელსაც ებრაული მედია ავრცელებს. მათი თქმით, ქართველი სპეციალისტის გადაბირებით თელ-ავივის „მაკაბია“ დაინტერესებული და კლუბის ხელმძღვანელობა ქეცბაის სარფიანი წინადადებითაც მიმართავსო. „მაკაბი“ მიმდინარე სეზონში ევროპულ სარბიელზე კარგად კი გამოიყურება, შიდა ჩემპიონატში საქმე მთლად კარგად ვერ აქვს და სატურნირო ცხრილში მე-7 ადგილზეა. როგორც ჩანს, გუნდის ბოსები ამით კმაყოფილები არ არიან და მთავარი მწვრთნელის, ბერძენი იორგოს დონისის გათავისუფლებას აპირებენ.
„მაკაბი“ ევროპა ლიგის პლეიოფში გავიდა, რაც დადებით შედეგად უნდა მივიჩნიოთ. ვნახოთ, გამართლდება თუ არა ებრაული მედიის სიტყვები და თემურ ქეცბაია „მაკაბის“ მთავარ მწვრთნელად დაინიშნება. ვფიქრობთ, ეს ქართველის სამწვრთნელო კარიერაში წინ გადადგმული ნაბიჯი იქნება.
