თავს ზემოთ ძალა არ იყო. საფრანგეთის ღია პირველობის საკვალიფიკაციო ეტაპის ნახევარფინალში მარიამ ბოლქვაძემ კი იბრძოლა, თუმცა მეტად გამოცდილ ვერა ზვონარევასთან ვერას გახდა და ორ სეტში – 3:6, 1:6 დამარცხდა.
ანგარიშმა არ მოგატყუოთ. მიუხედავად საგრძნობი სხვაობისა, ქართველი ჩოგბურთელი განსაკუთრებით პირველ სეტში რუს ჩოგბურთელს, რომელიც არც ისე შორეულ წარსულში მსოფლიო რეიტინგის მეორე ნომერი იყო მედგრად დაუდგა და ბრეიქითაც დაწინაურდა, თუმცა შემდეგ გამოცდილებამ მაინც თავისი გაიტანა.
მარიამ ბოლქვაძე კორტზე თავს მთლად კომფორტულად ვერ გრძნობდა, რადგან მხრის ტრავმამ რამდენჯერმე თავი შეახსენა, რის გამოც პირველი სეტის შემდეგ ჩვენებურმა ჩოგბურთელმა სამედიცინო ტაიმაუტი მოითხოვა.
რაც შეეხება მეორე პარტიას, აქ უკვე ვერა ზვონარევამ, რომელიც როლან გაროსის საკვალიფიკაციო ეტაპზე ქალთა შორის პირველ ნომრად არის განთესილი სადავეები ხელთ იგდო და საქმეც გამარჯვებამდე მიიყვანა.
ამრიგად, მარიამ ბოლქვაძემ პარიზში ასპარეზობა დაასრულა და ახლა უკვე ბალახის სეზონისთვის მომზადება მართებს.
