ფინალი აღარ იქნება. უფრო სწორად, ეკატერინე გორგოძის მონაწილეობით, თორემ შვეიცარიის ქალაქ ბელინცონაში მიმდინარე ITF-ის ქალთა საჩოგბურთო ტურნირს გამარჯვებული აუცილებლად ეყოლება.
სამწუხაროდ, ის ქართველი ჩოგბურთელი ვერ იქნება, რადგან ეკატერინე გორგოძეს ნახევარფინალური ბარიერის გადალახვა არ გამოუვიდა. ჩვენებური მეჩოგნე ჯულია გრაბერთან დამარცხდა.
ავსტრიელი ჩოგბურთელის უპირატესობა აშკარა იყო, რაც ანგარიშითაც თვალნათლივ ჩანს – 6:2, 6:2.
აქვე ისიც ვთქვათ, რომ ეკატერინე გორგოძემ ფინალი მაინც ითამაშა, ოღონდ წყვილთა თანრიგში და ჩემპიონობაც მოიპოვა. ქართველმა ჩოგბურთელმა გამარჯვება ანა დანილინასთან ერთად მოახერხა. ქართულ-ყაზახურმა დუეტმა ფინალში რებეკა მარინოს (კანადა) და იუკი ნაიტოს (იაპონია) წყვილი ორ სეტში – 7:5, 6:3 დაჯაბნეს.
