გავლენიანმა ესპანურმა გამოცემა Marca-მ საბა ქუმარიტაშვილის შესახებ ვრცელი სტატია გამოაქვეყნა, სადაც ჟურნალისტი 2010 წელს, ვანკუვერის ოლიმპიადაზე, ტრაგიკულად გარდაცვლილ ნოდარ ქუმარიტაშვილზეც საუბრობს. სტატიაში ვკითხულობთ:
„საბა ქუმარიტაშვილი ქართველი მოციგავეა, რომელმაც როგორც სპორტსმენებს, ისე რიგით ადამიანებს, გული აუჩუყა. საბა სცენაზე გამოჩნდა, რათა აესრულებინა ოცნება, რომელიც მისმა ბიძაშვილმა, ნოდარ ქუმარიტაშვილმა 2010 წელს ვერ აისრულა.
იმ დროს ნოდარის ბიძაშვილი საბა ბავშვი იყო, მაგრამ მან ოჯახური ტრადიცია გააგრძელა. 12 წლის შემდეგ, დაღუპული ბიძაშვილის სახელისთვის პატივის მისაგებად და მისი ოცნების გასაგრძელებლად საბა ქუმარიტაშვილმა მონაწილეობა პეკინის ზამთრის ოლიმპიურ თამაშებში მიიღო.
„ნოდარზე ფიქრი მტკივნეულია, მაგრამ ძალასაც მმატებს. ჩვენი ოჯახის თითოეულ თაობაში ერთი მოციგავე მაინც გვყავდა და ახლა მამაჩემი და მე ნოდარის ნაბიჯებს მივყვებით“, – განუცხადა საბამ AP-ს ოლიმპიადის დაწყებამდე.
უცნაური დამთხვევაა და საბა პეკინის ოლიმპიადაზე მონაწილეობისას ზუსტად იმ ასაკშია (21 წლის), როდესაც მისი ბიძაშვილი ვანკუვერი -2010-ზე გაემგზავრა. საბა მედლის აღებისგან შორს აღმოჩნდა, მაგრამ სპორტსმენი ამბობს, რომ ის კმაყოფილია, რადგან ზამთრის ოლიმპიურ თამაშებში მონაწილეობის მისია შეასრულა:
„ის გავაკეთე, რაც უნდა გამეკეთებინა. აღფრთოვანებული ვარ და სიმართლე გითხრათ, ცოტას ვნერვიულობდი. საკუთარი თავით ვამაყობ და ძალიან ბედნიერი ვარ“, – ამბობს საბა ქუმარიტაშვილი.
შეგახსენებთ, რომ საბა ქუმარიტაშვილმა პეკინის ზამთრის ოლიმპიადაზე, თავისი ოლიმპიური დებიუტი 31-ე ადგილზე დაასრულა.
