ევროპის საფეხბურთო ჩემპიონატის პირველი ფინალისტი ცნობილია. ეს იტალიის ნაკრები იქნება. რობერტო მანჩინის გაწრთვნილმა გუნდმა ლონდონში, „უებლიზე“ გამართულ ნახევარფინალურ დაპირისპირებაში ესპანეთის ნაკრებს სძლია.
უფრო სწორად, „სკუადრა აძურამ“ მეტოქეს ძირითად დროში ვერაფერი დააკლო. გადაუჭარბებლად შეიძლება ითქვას, რომ ლუის ენრიკეს შეგირდები რიგ ეპიზოდებში მეტოქეზე უკეთაც გამოიყურებოდნენ. საბოლოოდ მატჩის ფრედ – 1:1 დასრულდა და გამარჯვებულის ბედი პენალტების სერიამ გამოავლინა, რომელიც უკეთ იტალიელებმა შეასრულეს.
ცხადია, იმედგაცრუებულია ესპანელთა დამრიგებელი ლუის ენრიკე.
„ბედნიერი ვარ იმით, რაც ვნახე: ორი ძალიან მაღალი დონის გუნდი. სპექტაკლი გულშემატკივრებისთვის, იმედი მაქვს იტალია ფინალში შესანიშნავ თამაშს აჩვენებს.
არ ვნანობ, ყველა თავისას აკეთებს. თამაში მხეცური ინტენსივობით. ორი მანქანა ერთმანეთის პირისპირ, ერთ-ერთი საუკეთესო მატჩი, რაც ევროპის ჩემპიონატზე ვინმეს უნახავს. იმედგაცრუებულები ვართ, მაგრამ ეს ფეხბურთის ნაწილია, უნდა იცოდე როგორ მოიგო, და წაგებაც უნდა იცოდე.
ლუკაკუს წინააღმდეგ კიელინისა და ბონუჩის თამაშის ნახვის შემდეგ გავიფიქრე, აჯობებს გამოკვეთილი ფორვარდი მომეხსნა და ნახევარდაცვაში ერთი კაცი დამემატებინა. ფინალში იტალიას ვუგულშემატკივრებ” – აღნიშნა ლუის ენრიკემ.
