იასპერ სილესენი კვლავ ტრავმირებულია. ავტორიტეტული გამოცემა “მარკა” ვარაუდობს, რომ “ბარსელონასთან“ შეხვედრაში “ღამურების” კარს მამარდაშვილი დაიცავს.
გიორგი მამარდაშვილმა “ვალენსიას“ შემადგენლობაში ზედიზედ სამ შეხვედრაში ითამაშა – “რეალ სოსიედადთან“, “ბილბაოს ატლეტიკთან“ და “ალავესთან“. მართალია “ღამურებმა“ ვერცერთი შეხვედრა ვერ მოიგეს, თუმცა ქართველი მეკარე სამივე მატჩში დამაჯერებლად გამოიყურებოდა და რამდენიმე რთული ბურთის მოგერიებაც მოახერხა.
გიორგი მამარდაშვილმა მიმდინარე სეზონში “ვალენსიას“ ძირითად შემადგენლობაში საერთო ჯამში 9 შეხვედრა ჩაატარა და სამჯერ კარის მშრალად შენახვა შეძლო. მის ანგარიშზე 11 გაშვებული ბურთია. 24 ტურის შემდეგ “ვალენსია“ “ლა ლიგის“ სატურნირო ცხრილში 30 ქულით მე-12 ადგილს იკავებს. ბორდალასის გუნდი მომდევნო მატჩს 20 თებერვალს, საკუთარ მოედანზე “ბარსელონას“ წინააღმდეგ გამართავს.
