საქართველოში „ვილიარეალის“ აკადემია ოფიციალურად გაიხსნა და ამასთან, ბავშვების რეგისტრაციაც დაიწყო. აკადემიაში გაწევრიანების მსურველებს რეგისტრაციის გავლა ამ ბმულის მეშვეობით შეუძლიათ.
გახსნის შემდეგ, ჟურნალისტებთან აკადემიის სპორტულმა დირექტორმა, გიორგი თავბერიძემ სამომავლო გეგმებზე ისაუბრა:
„ვფიქრობთ, რომ ვილიარეალის აკადემიის გახსნა წინ გადადგმული ნაბიჯია.
ესპანური კლუბის შემოსვლა კარგი პროექტია საქართველოსთვისა და ახალგაზრდა ფეხბურთელებისთვის ქართულ ბაზარზე. მათი გამოცდილება და სავარჯიშო მეთოდოლოგია ბავშვებს მისცემს საშუალებას, გამოავლინონ თავიანთი შესაძლებლობები და პოტენციალი!
ჩვენი მიზანია, ბავშვები ვავარჯიშოთ კომფორტულ გარემოში, კვალიფიციური მწვრთნელების მეთვალყურეობის ქვეშ და გავუხსნათ გზა ვილიარეალის ასაკობრივ და დიდ გუნდში დაწინაურებისთვის.
მუდმივ კონტაქტზე იქნებიან ესპანელები. გააკონტროლებენ სავარჯიშო, სამედიცინო პროცესებს, რათა ხარისხიანი და მაღალი დონის ევროპული ტრადიციები დავნერგოთ ჩვენს სკოლაში.
წელიწადში რამდენჯერმე იგეგმება მათი ჩამოსვლა საქართველოში და სემინარები. ასევე ჩვენი ქართველი ბავშვები გაემგზავრებიან სინჯებზე ესპანეთში, ვინც დააკმაყოფილებს ვილიარეალის დონეს, მარტივად გადავა ესპანურ გუნდში.
ვილიარეალთან კონტაქტი და ხელშეკრულების გაფორმება გენერალურმა დირექტორმა გიორგი შანიძემ მოახერხა. მათი ხედვა და დამოკიდებულება ფეხბურთის მიმართ ჩვენთვის საინტერესო და დადებითი აღმოჩნდა, რის შემდეგაც თანამშრომლობა დავიწყეთ“, – ამბობს თავბერიძე.
