ეროვნული ლიგის მეოთხე ტურის მატჩი თბილისის „დინამოს“ და „საბურთალოს“ შორის ძალზედ საინტერესო, დაძაბული, დრამატული და რაც მთავარია უხვგოლიანი კი გამოდგა, მაგრამ სკანდალური გაგრძელებაც მოჰყვა.
შეგახსენებთ, „დინამომ“ მეტოქე 4:3 დაამარცხა, თუმცა „საბურთალოს“ მთავარი მწვრთნელი ლევან კორღალიძე თვლის, რომ სამართლიანი თამაშის პრინციპები იყო დარღვეული და მსაჯმა გიორგი კიკაჩეიშვილმა ბევრი უხეში შეცდომა დაუშვა, რამაც მატჩის შედეგზე პირდაპირი გავლენა იქონია.
ლევან კორღალიძემ აღშფოთება ვერ დაფარა და სოციალურ ქსელში პოსტიც გამოაქვეყნა, სადაც მთავარ არბიტრს აკრიტიკებს და ამბობს, რომ უსამართლოდ მოექცნენ.
პრაიმსპორტი „საბურთალოს“ მთავარ მწვრთნელს დაუკავშირდა და ამ თემასთან დაკავშირებით ინტერვიუ ჩაწერა.
-ბატონო ლევან, ფეხბურთში მყოფ ხალხს და სპორტულ მედიას თქვენი ასეთი გაბრაზება არ ახსოვს. ალბათ მართლა მოთმინების ფიალა აგევსოთ.
-დიახ, ყოველთვის ვცდილობდი და ვცდილობ თავშეკავებული ვიყო. ასეთი გაბრაზებული არასოდეს ვყოფილვარ, მაგრამ უკვე ყველაფერს აქვს ზღვარი.
არ ვიცი ეს მიზანმიმართული ქმედებაა თუ არაკომპეტეტნტურობა, მაგრამ ფაქტია, რომ მაგრად დაგვჩაგრეს. როდესაც ასეთ უსამართლობას ვხედავ ვერ გავჩუმდები. ჩემგან არავის ახსოვს მსაჯებზე ოდესმე რაიმე ზედმეტი ან გადაკრული მეთქვას. პირიქით, მატჩის შემდეგ მათთან მივდივარ და მადლობასთან ერთად ბოდიშსაც ვუხდი ემოციურ ფონზე თუ რაიმე უხეში ნათქვამი მომივა.
-ამ შემთხვევაში რა მოხდა? რამ გამოიწვია თქვენი აღშფოთება?
-გიორგი კიკაჩეიშვილმა. ამ მსაჯის მიმართ სხვა დროს და სხვა გუნდებსაც არაერთხელ გამოუთქვამთ პრეტენზია. ეს პირველი შემთხვევა არ ყოფილა, როდესაც მის ქმედებებზე და უსამართლო გადაწყვეტილებებზე გაბრაზდნენ.
პირადად მეც და ჩემი გუნდიც მისგან უკვე მეორედ დავიჩაგრეთ. შარშანაც მოხდა მსგავსი ფაქტი. როდესაც მწვრთნელი თავის საქმე კარგად ვერ ასრულებს ან მისით უკმაყოფილონი არიან მას რა ბედი ელის? დაკავებული თანამდებობიდან ათავისუფლებენ ხომ მართალია? და რატომ არ შეიძლება იგივე პრინციპი მოქმედებდეს თუნდაც მსაჯებზეც. პოსტში ვთქვი და გავიმეორებ, ეროვნულ ჩემპიონატს და ზოგადად ქართულ ფეხბურთს ასეთი შემთხვევები უკან ხევს. ასე წინ ვერ წავალთ.
-კონკრეტულად რას გულისხმობთ? ბოლო წუთებზე საბურთალოს მიერ გატანილ და არჩათვლილ გოლს?
-არა მაგაზე ენა როგორ მომიბრუნდება. სხვას თუ ვთხოვ ობიექტურობას, მე საწინააღმდეგოს ხომ არ ვიტყვი ან გავაკეთებ? გოლის ეპიზოდში ნამდვილად იყო თამაშგარე მდგომარეობა.
პრეტენზია პენალტის ეპიზოდებზე მაქვს. დიახ, არა ერთზე, არამედ ორ შემთხვევაზე. ხელით თამაში მარტო საბურთალოს საჯარიმოშია პენალტი და მეტოქისაში არა? არ ვიცი ამ ქმედებას რა სახელი დავარქვა. გიორგი კიკაჩეიშვილი ძალიან არაობიექტურად მოიქცა.
-თქვენ ემოციურ განცხადებაში „დინამოსაც“ ახსენებთ. ფიქრობთ მსაჯები ეხმარებიან?
-დინამო ქართული ფეხბურთის ფლაგმანია. ყოველთვის დავრჩები მის რიგით გულშემატკივრად საერთაშორისო ასპარეზზე, მაგრამ ამ შემთხვევაში მე სხვა გუნდს წარმოვადგენ. დინამოს მიმართ არავითარი პრეტენზია არ მაქვს. უბრალოდ სიტყვას მოვაყოლე, რომ ასეთი გამარჯვებები არც დინამოს და არც სხვა გუნდს არ უნდა ჭირდებოდეს.
–ბოლომდე ჩავყვებიო ამბობთ. რას გულისხმობთ, ფედერაციას მიმართავთ ან სამსაჯო კომიტეტს?
-არა, ამის გაკეთებას არ ვაპირებ.
-აბა, რას აპირებთ?
-შესაძლოა ფეხბურთიდანაც წავიდე. მთელი ცხოვრება ამ საქმეს შევალიე. თამაშები წამიგია და მომიგია, მაგრამ მიზანმიმართულ არაობიექტურობას ვერ შევეგუები. დაველაპარაკები გუნდის ხელმძღვანელობას. სერიოზულად ვფიქრობ, რომ დროებით გვერდზე გავდგე და ფეხბურთში საქმიანობას ჩამოვცილდე.
