საქართველოს საფეხბურთო ნაკრების ყოფილმა კაპიტანმა, კახა კალაძემ შოთა არველაძის შესახებ ისაუბრა და აღნიშნა, რომ ის საქართველოს ეროვნული გუნდის კარგი მწვრთნელი იქნებოდა.
“რა თქმა უნდა, ყველა ადამიანს აქვს თავისი მოსაზრების გამოთქმის შესაძლებლობა. ძალიან გამიხარდებოდა, თუ შოთა არველაძე ეროვნული ნაკრების მწვრთნელი იქნებოდა. როგორც ვიცი, ამასთან დაკავშირებით, რამდენჯერმე შეთავაზებაც იყო, თუმცა, მან უარი განაცხადა, რაც ძალიან სამწუხაროა, იმიტომ, რომ თუ რაიმე წარმატებას მივაღწიეთ, ეს წარმატება ვის უნდა მოვახმაროთ, თუ არა ჩვენს ქვეყანას, ფეხბურთს, სპორტს, ეროვნულ ნაკრებს?! გულწრფელად გეტყვით, მისი უარი ჩემთვის ცოტა გაუგებარი იყო, რადგან მგონია, რომ ის ეროვნული ნაკრებისთვის ძალიან კარგი მწვრთნელი იქნებოდა. ამასთან, ბევრი ძლიერი და წარმატებული ფეხბურთელი გვჭირდება. იმედია, ისინი იმ თამაშის ჩვენებას შეძლებენ, რომელიც ეროვნულ ნაკრებს სჭირდება იმისთვის, რომ წარმატებებს მივაღწიოთ”, – განაცხადა კალაძემ.
შეგახსენებთ, რომ შოთა არველაძემ სექტემბერში ჩატარებული 3 წარუმატებელი მატჩის შემდეგ საქართველოს ნაკრები და მისი მწვრთნელი ვილი სანიოლი გააკრიტიკა, რასაც ქვეყნის ფეხბურთის ფედერაციის პრეზიდენტის ლევან კობიაშვილის მძაფრი რეაქცია მოჰყვა. მათ რამდენიმე განცხადება გააკეთა და კობიაშვილმა არველაძეს ისიც კი ურჩია, რომ მისი საქმისთვის მიეხედა.
