1981 წლის 13 მაისი, ლეგენდარული კოტე მახარაძის ის უკვდავი ფრაზა და კადრი, რომელიც ქართული ფეხბურთის სტაჟიან გულშემატკივარს არასოდეს დაავიწყდება.
ქართული ფეხბურთის ფლაგმანის, თბილისის „დინამოს“ დიუსელდორფული ტრიუმფი, მსაჯის საფინალო სასტვენი და ადამიანი, რომელმაც იმ გამარჯვების ბურთით ჩახუტებულმა მოკურცხლა.
ანზორ გაბიტაშვილის ის გაქცევა თასების თასის ფინალში „დინამოს“ იმ ისტორიული გამარჯვების ერთ-ერთი სიმბოლო და ასოციაციაა.
სამწუხაროდ, თბილისის „დინამოს“ იმ ოქროს ხანის ექიმი და ფიზიოთერაპევტი ანზორ გაბიტაშვილი 82 წლის ასაკში გარდაიცვალა.
ანზორ გაბიტაშვილი 1939 წელს გურჯაანის რაიონის სოფელ ვეჯინიში დაიბადა. 1966 წელს დაამთავრა საქართველოს სახელმწიფო ფიზკულტურის ინსტიტუტის სამკურნალო ფაკულტეტი.
1976-1986 წწ. წლიდან საქართველოს ოსტატ ფეხბურთელთა გუნდის “დინამოს” ფიზიოთერაპევტი; 1990 წლიდან საქართველოს ეროვნული ნაკრების გუნდის ფიზიოთერაპევტი.
2005 წელს ანზორ გაბიტაშვილი დაჯილდოვდა საქართველოში სპორტული მედიცინის განვითარებაში შეტანილი განსაკუთრებული წვლილისათვის.
