სანაკრებო პაუზის შემდეგ, განახლებული ეროვნული ლიგის გათამაშება თბილისის „დინამოს“ და ქობულეთის „შუქურას“ დაპირისპირებით გაიხსნა და შეიძლება ითქვას მოულოდნელი შედეგიც დაფიქსირდა.
კახაბერ ცხადაძისთვის „დინამოს“ მთავარი მწვრთნელის რანგში ეს სადებიუტო მატჩი გახლდათ და ცხადია სურდა საქმიანობა გამარჯვებით დაეწყო, თუმცა ასე არ ფიქრობდნენ ქობულეთელები. ზღვისპირელებმა ბოლომდე მედგრად იბრძოლეს და საპატიო ფრესაც მიაღწიეს.
ანგარიში მასპინძლებმა გახსნეს, თუმცა ქართული ფეხბურთის ფლაგმანს გოლის გატანა კი დაუგვიანდა. უგოლო პირველი ტაიმის შემდეგ, „დინამოს“ სერბმა ლეგიონერმა ზორან მარუშიჩმა სტუმრები 64-ე წუთზე დაამწუხრა.
„შუქურას“ სასახელოდ უნდა ითქვას, რომ გაშვებული გოლის მიუხედავად არ დაითრგუნნენ და პირიქით წონასწორობაც აღადგინეს. ქობულეთელთა რიგებშიც თავი ლეგიონერმა გამოიჩინა. 82-ე წუთზე ბრაზილიელმა ჯეფერსონ ალმეიდან ანგარიში გაათანაბრა – 1:1.
16 ტურის შემდეგ „დინამო“ 32 ქულით სატურნირო ცხრილში პირველ ადგილზეა, ხოლო „შუქურა“ 15 ქულით მერვეზე.
