გერმანიის ნაკრების გულშემატკივრებს წინა მსოფლიოს ჩემპიონატი წესით მწარედ უნდა ახსოვდეთ. 2018 წლის მუნდიალის ერთ-ერთი მთავარი სენსაცია ხომ ბუნდესგუნდის ჯგუფში ჩარჩენა გახლდათ.
იოახიმ ლიოვის შეგირდებს იგივე ფიასკომდე, ოღონდ ამჯერად უკვე მიმდინარე ევროპის ჩემპიონატზე, სულ რაღაც 6 წუთი აშორებდათ. გერმანიის ნაკრები, მიუნხენის „ალიანს არენაზე“ ჯგუფური ეტაპის დასკვნით მატჩში უნგრეთთან ორჯერ აგებდა, თუმცა სავალალო მდგომარეობას თავი მაინც დააღწია და ფრედ – 2:2 ითამაშა, რამაც მესამე ადგილი და პლეიოფის საგზური გაუნაღდა.
1/8 ფინალში, გერმანიის ნაკრების მეტოქე ინგლისი იქნება. ეს სუპერ დაპირისპირება 29 ივნისს ლონდონში, „უიემბლის“ სტადიონზე გაიმართება.
უნგრეთთან მატჩის შემდეგ იოახიმ ლიოვი დიდად კმაყოფილი არ იყო, თუმცა შედეგით მაინც ბედნიერია.
,,ხასიათი გამოვავლინეთ, მაგრამ, ამავდროულად, შეცდომები დავუშვით. სასიამოვნო საყურებელი იყო თუ როგორ ვიბრძოდით მანამ, სანამ ანგარიში არ გავათანაბრეთ. ვიცოდით, რომ უნგრეთი ბოლომდე იბრძოლებდა. ჯგუფიდან გასვლით ბედნიერი ვარ.
პირველად გათანაბრების შემდეგ, გოლის მაშინვე გაშვება უდიდესი შეცდომა იყო. თუ ამ ტურნირზე რამის მიღწევა გვინდა, ასეთი რამ აღარ უნდა გამეორდეს, მაგრამ საკუთარ თავში ეჭვი არ გვეპარება.
ყველა ,,პატარა” გუნდი დიდ ძალისხმევას ხარჯავს და თავს კარგად იცავს. უნგრეთის ნაკრებს, რომელიც საკუთარ ნახევარზე 10 ფეხბურთელით მოქმედებდა, დასაკარგი არაფერი ჰქონდა.
ძალიან კარგია, რომ ამ რთული ჯგუფიდან გავედით. წინ ინგლისის ნაკრებთან მატჩი გველის” – აღნიშნა გერმანელთა დამრიგებელმა.
