ლიგა 1-ის „მეცი“ ახალი სეზონისთვის მზადებას აგრძელებს, 28 ივლისს გიორგი მიქაუტაძის გუნდი მორიგ ამხანაგურ მატჩს გამართავს, მეტოქე ფრანგული „ტრუაა“. score.fr-ის ინფორმაციით, 20 წლის ქართველ ფორვარდს კვლავ სასტარტო შემადგენლობაში უნდა ველოდოთ.
შეგახსენებთ, რომ გიორგი მიქაუტაძის საკითხი საბოლოოდ სეზონის წინ გადაწყდება, შესაძლოა, მას ლიგა 1-ში თამაშის შანსი მიეცეს, თუმცა არც იჯარით გაშვებაა გამორიცხული. გიორგის იმედი საფრანგეთში ნამდვილად აქვთ.
აი, რას წერს „მეცის“ ერთ-ერთი ფანკლუბი: „გასულ სეზონში მძიმედ ტრავმირებული იბრაიმა ნიანი შეეცდება ამ სეზონში აინაზღაუროს გაცდენილი დრო. მეცის ფორვარდმა უკვე აჩვენა, რომ მზადაა, გაიბრწყინოს ლიგა 1-ში. გასულ სეზონში სერენში გამორჩეული მიქაუტაძე კი კარგად გამოიყურება მეცის შეკრებაზე, ის ახალ სეზონში კლუბის მნიშვნელოვანი ელემენტი იქნება შეტევაში“.
„ტრანსფერმარკტი“ ქართველ ფორვარდს 1.2 მილიონ ევროდ აფასებს.
