ბელგიური „სერენსი“ თავისი ეროვნული ჩემპიონატის უმაღლეს ლიგაში გადმოსასვლელად ემზადება. გუნდი ამ სანუკვარ მიზანთან ერთ ნაბიჯშია.
რა თქმა უნდა, ამ კლუბით დიდად არ დავინტერესდებოდით და ალბათ ყურადღებასაც არ მივაქცევდით რომ არა ერთი მნიშვნელოვანი გარემოება – „სერენსში“ ქართველი ფეხბურთელი გიორგი მიქაუტაძე თამაშობს. ის გუნდის ერთ-ერთი საკვანძო ფიგურა, ლიდერი და საუკეთესო ბომბარდირია.
„სერენსს“, ჟუპილერ ლიგის საგზურის მოსაპოვებელი პლეიოფის მატჩი 1 მაისს „ვაასლანდ-ბევერენთან“ ელის, რომელიც ორ მატჩიანი დაპირისპირებისგან შედგება.
მატჩისწინა პრესკონფერენციაზე „სერენსის“ მთავარმა მწვრთნელმა მედიასთან სასაუბროდ სწორედ გიორგი მიქაუტაძე იახლა. აი, რა თქვა საქართველოს ნაკრების 20 წლის ფეხბურთელმა ამ პრინციპული და მნიშვნელოვანი მატჩის წინ.
„ვფიქრობ, საერთო ჯამში შესანიშნავი სეზონი გვქონდა. პლეიოფში თამაშის უფლება მოვიპოვეთ, რაც პატარა ამბავი ნამდვილად არ უნდა იყოს.
ზეწოლას საერთოდ არ განვიცდით და გვიხარია, რომ წინ ასეთი მატჩი გველის. სეზონის დასაწყისში კარგად დაწყებული საქმე, უკეთესაც უნდა დავაგვირგვინოთ. ახლა ყველაფერი ჩვენზეა დამოკიდებული.
მეტოქე ყველაფერს გააკეთებს, რათა არ დაქვეითდეს, ჩვენ კი პირიქით უმაღლესში აღზევება გვსურს. ამიტომ, მეტად საინტერესო და დაძაბული მატჩი უნდა გამოდგეს. ნებისმიერ შემთხვევაში ჩვენთვის ეს სეზონი ალბათ წარმატებულად ჩაითვლება, მაგრამ მიზანთან ძალიან ახლო ვართ და მისი ვერ შესრულება უდიდესი იმედგაცრუება იქნება“ – ამბობს გიორგი მიქაუტაძე.
