ადრე თუ გვიან ალბათ ეს მოხდებოდა. ძალიან რთული, თითქმის წარმოუდგენელია მთელი ჩემპიონატი ისე განვლო ერთხელაც არ დამარცხდე. რა თქმა უნდა, სხვადასხვა ევროპულ ჩემპიონატებში ასეთი ფაქტებიც დაფიქსირებულა, მაგრამ თითქმის თითზე ჩამოსათვლელად.
ეროვნული ლიგის გათამაშების მეცხრე ტურში კი ბათუმის „დინამომაც“ პირველი მარცხი იწვნია. ზღვისპირელებმა გორში წაიფორხილეს და ადგილობრივ „დილასთან“ 1:2 წააგეს.
მასპინძლებმა ანგარიში 23-ე წუთზე გახსნეს, როდესაც „დილას“ ახალგაზრდა ფორვარდმა პაატა ღუდუშაურმა თავისი გუნდი დააწინაურა. გია გეგუჩაძის შეგირდები გააქტიურდნენ და მეტოქის კართან არაერთი საგოლე მომენტი შექმნეს, თუმცა ბრწყინვალედ მოქმედებდა გორელთა კარის დარაჯი ლუკა გუგეშაშვილი. „დილას“ 21 წლის მეკარემ არაერთი რთული ბურთი მოიგერია და ბათუმელებს გათანაბრების საშუალება არ მისცა.
კულმინაცია კი მატჩის ბოლო წუთები გამოდგა. გორელებმა მეორე გოლი 90-ე წუთზე ნიკა გაგნიძის არაჩვეულებრივი დარტყმის შედეგად გაიტანეს. ბათუმელთა კიპერი ლაზარე კუპატაძე უძლური იყო. ბათუმმა ისღა შეძლო მსაჯის მიერ კონპენსირებულ დროში ანგარიში მხოლოდ შეემცირებინა. პენალტი ვლადიმერ მამუჩაშვილმა ზუსტად შეასრულა.
ბოლოს კი ისიც დავძინოთ, რომ ამ მატჩს თურქ მსაჯთა ბრიგადა ემსახურებოდა.
ეროვნული ლიგის მეათე ტური 24-25 აპრილს გაიმართება.
