ალბათ იცანით, ეს ნოვაკ ჯოკოვიჩია. ამბავი კი წლეულს იანვარში მწვანე კონტინენტზე ახლადაარსებულ ტურნირზე მოხდა, რომელსაც ATP-ის თასი ეწოდება და იმთავითვე ნათელი იყო, რომ ჩოგბურთში დევისის თასზე არანაკლებ პრესტიჟული სანაკრებო ტურნირი გახდებოდა.
პირველი გათამაშების ჩემპიონი კი სერბეთის ნაკრები გახდა, ფინალში კი ესპანეთს სძლიეს. ჯოკოვიჩიც კორტზე ამიტომ გართხმულა.
ეს შესავალი კი იმიტომ დაგვჭირდა, რომ გაისად 1-5 თებერვალს დაგეგმილ ATP თასის გათამაშებაში, სადაც მონაწილე გუნდების რაოდენობა განახევრდა და 12 ნაკრები ითამაშებს სერიოზული ცვლილებებია. კერძოდ, შვეიცარიის ნაკრებმა მასში მონაწილეობაზე უარი თქვა. ვერ გეტყვით, ეს გადაწყვეტილება იმით არის გამოწვეული, რომ როჯერ ფედერერი ავსტრალიის ღია პირველობაზე არ ითამაშებს და შვეიცარიელებს უროჯეროდ ამ პრესტიჟულ შეჯიბრში გამოსვლა არ სურთ თუ სხვა რამ ფაქტორების გამო, მაგრამ ტურნირის საორგანიზაციო კომიტეტში ნეიტრალური ქვეყნის უარი დაადასტურეს.
შვეიცარიის ნაკრებს კი ATP თასის გათამაშებაში კანადის ნაკრები ჩაანაცვლებს. დენის შაპოვალოვმა და მილოშ რაონიჩმა ტურნირში მონაწილეობაზე უკვე თანხმობა განაცხადეს.
