ATP-ის ტურში ყველაზე ხანმოკლე ბალახის სეზონია. რატომღაც, ამ ტიპის საფარზე გრუნტის და ჰარდისგან განსხვავებით შედარებით ცოტა ტურნირები იმართება.
ცხადია, უმთავრესი უიმბლდონია, ხოლო თუ სხვა გამორჩეულ ტურნირებზე ვისაუბრებთ, მათნაგ ყველაზე პრესტიჟული უდავოდ ჰალეს შეჯიბრია, სადაც არაერთი ტოპ ჩოგბურთელი არ თაკილობს მონაწილეობას.
როჯერ ფედერერს რომ ბალახის საფარი ძალიან უყვარს ეს არახალი ამბავია. დიად შვეიცარიელ მეჩოგნეს ასევე გამორჩეულად იზიდავს ჰალეს ტურნირი და ჩემპიონობის მხრივაც აბსოლუტური რეკორდსმენი გახლავთ. როჯერი აღნიშნული შეჯიბრის 10-გზის გამარჯვებულია.
ჰალეში ასპარეზობა როჯერ ფედერერმა წლეულსაც წარმატებით დაიწყო. ვეტერანმა ჩოგბურთელმა სასტარტო მატჩში ბელარუსი ილია ივაშკა დაამარცხა.
მატჩის შემდეგ, როჯერმა მედიასთან საუბარში ყურადღება იმაზე გაამახვილა, რომ ბალახის საფარზე თამაშით კვლავ ბედნიერია.
„ძალიან მომენატრა ბალახზე თამაში, კარგი იყო დაბრუნება ჰალეში, რადგან აქ თამაში მიყვარს. გამარჯვების მოპოვება სასიამოვნოა. ჩვენ ჩოგბურთელები ყველანი ერთ ნავში ვართ. ორი წელია ბალახზე არ გვითამაშია.
უიმბლდონზე ჩემი მიზნები საკმაოდ ამბიციაურია. ლონდონში მხოლოდ ჩემპიონობისთვის ვიბრძოლებ.
